....ABŞ Ordusu dronların, o cümlədən günəş enerjisi ilə işləyən dronların uçuş dözümlülüyünü artırmaq üçün yeni texnologiyaları sınaqdan keçirir. ABŞ Müdafiə Nazirliyinin dəstəyi ilə AeroVironment günəş enerjisi ilə işləyən və aylarla stratosferdə qala bilən təkmilləşdirilmiş Sunglider yüksək hündürlük platformasını sınaqdan keçirib.
SİA-nın xarici qaynaqlardan əldə etdiyi məlumata görə, yeni versiya Horus A 70 kq-a qədər faydalı yükü dəstəkləyə bilir, çoxsəviyyəli ehtiyat sistemi ilə təchiz olunub və çətin şəraitdə stabil rabitə eləcə də naviqasiyanı dəstəkləyir.
“Hi-Tech” xəbər verir ki, pilotsuz təyyarə sistemi dron dəstələrinin döyüş meydanında daha effektiv işləməsinə imkan verəcək.
AeroVironment hökumətin istifadəsi üçün Sunglider-in yeni versiyası olan Horus A hazırlayıb. Günəş enerjisi ilə işləyən pilotsuz təyyarə sistemi mövcud gücü 1,5 kVt olan 70 kq-a qədər faydalı yük daşıya bilir. Dron artan muxtariyyət və missiyanın etibarlılığını artıran çoxsəviyyəli ehtiyat sisteminə malikdir.
Horus A HAPS - yüksək hündürlük platformaları və ya atmosfer peyklərinə aiddir. Bu, Yerə nisbətən sabit bir nöqtədə 20–50 km yüksəklikdə uzun müddət qala bilən pilotsuz uçuş aparatlarına verilən addır.
Pilotsuz təyyarə ABŞ Ordusundan uçuşa yararlılıq təsdiqini və Federal Aviasiya Administrasiyasından xüsusi uçuşa yararlılıq sertifikatı alıb ki, bu da onun milli hava məkanında uçuş sınağından keçirilməsinə icazə verib. Son uçuş zamanı Horus A ABŞ Müdafiə Nazirliyi üçün çoxlu faydalı yükləri daşımaq və məlumatları real vaxtda ötürmək qabiliyyətini nümayiş etdirib.
Əli Babayev