“Mənim kitablarımın əksəriyyətinin məzmunu psixoloji qətllərdir. Kitablarımın hər birində bir az şəxsi məzmun var”.
SİA-nın AZƏRTAC-dan əldə etdiyi məlumata görə, bunu açıqlamasında dünyaşöhrətli alman yazıçı Vulf Dorn söyləyib.
"Mən çox şadam ki, yeni kitabım indi Azərbaycanda təqdim olunur. Bu, mənim şəxsi hekayəm olub və COVID-19 pandemiyası nəticəsində baş vermiş itki haqqındadır. Mən bu hekayədəki qəhrəmanı psixoloji bir məxluqa çevirməyi düşündüm", - deyə o qeyd edib.
Bakıya ikinci dəfədir gəldiyini və paytaxtımıza çox heyran olduğunu bildirən almaniyalı yazıçı bütün insanların çox mehriban və dostcanlı olduğunu söyləyib. "Bura həm də tarixi şəhərdir. Bu gün biz Xalça Muzeyində olmuşuq, əməkdaşlar mənə xalça hazırlamaq haqqında danışdılar. Xalçalarda istifadə olunan simvollar əsrarəngizdir, hər birinin öz mənası var. Bundan əlavə, İçərişəhərə də getdim. Bakı gözəl şəhərdir və ümid edirəm ki, bundan sonra tez-tez gələcəyəm", - deyə Vulf Dorn diqqətə çatdırıb.