...Deməli, Seul Milli Universiteti, Qvanqju Elm və Texnologiya İnstitutu eləcə də Koreya Elm və Texnologiya İnstitutunun tədqiqatçıları öz nəticələrini “Science Advances” jurnalında dərc ediblər.
SİA əldə etdiyi məlumata istinadən xəbər verir ki, bu barədə “New Voice” yazır.
...Onlar öz işlərində pişiklərin qaranlıqda görməsinə və kamuflyaj edilmiş obyektləri aşkar etməsinə imkan verən pişik gözlərinin iki əsas xüsusiyyətini kopyalayıblar.
Dronlara və robotlara quraşdırılmış müasir kameralar dairəvi diafraqmalardan istifadə edərək, əsasən insan gözünü təqlid edir.
Bu, şəklin həm ön planının, həm də fonunun diqqət mərkəzində olmasına səbəb olur. Lakin bu yanaşma konkret obyektlərin izlənilməsini çətinləşdirir. Bunun əksinə olaraq, pişik kimi heyvanların gözlərində asimmetrik sahə dərinliyi yaradan şaquli dəyirmi çuxur var. Məhz bu xüsusiyyət pişiklərə obyektləri daha effektiv izləməyə imkan verir.
Beləliklə, tədqiqatçılar yeni süni göz yaratmaq üçün bu prinsipi tətbiq etmək qərarına gəliblər.
Onlar fonu bulanıq qoyaraq hədəf obyekti fokusda saxlamağa imkan verən şaquli diaframa malik kamera hazırlayıblar.
Bu, hədəf izləməni yaxşılaşdırır və gündüz müşahidələri zamanı kameranı daha effektiv edir.
Pişiklər retinanın arxasında işığa həssaslığı artıran əks etdirici təbəqə olan tapetum lucidumun olması səbəbindən əla gecə görmə qabiliyyətinə malikdir.
Bu təbəqə də pişik gözlərinin qaranlıqda parlamasına səbəb olur. Bu xüsusiyyəti təqlid etmək üçün mühəndislər süni gözlərinə görüntü sensorunun arxasında gümüş metal reflektorlar əlavə ediblər.
Bu iki əsas xüsusiyyət sayəsində yeni kamera zəif işıqlı şəraitdə daha yaxşı görə bilir və hədəfləri kamuflyajla belə effektiv şəkildə izləyə bilir. Belə bir cihaz robototexnika, dron və yüksək dəqiqlikli müşahidə sistemləri tələb edən digər texnologiyalarda geniş tətbiq tapa bilər.
Nazlı Almuradova