Lüksemburq Sağlamlıq İnstitutunun alimləri xəstələrin 25 saniyəlik səs yazılarını təhlil edərək diabetin aşkarlanması üçün yeni üsul hazırlayıblar. Tədqiqatın nəticələri hazırda Madriddə keçirilən Avropa Diabet Tədqiqatı Assosiasiyasının (EASD) illik toplantısında təqdim olunub.
SİA-nın əldə etdiyi məlumata görə, tədqiqatda tip 2 diabeti olan və olmayan 607 böyük iştirak edib. Onlardan verilmiş materialdan bir neçə cümlə oxumaq və 25 saniyəlik səs yazıları etmək tapşırılıb.
Alimlər könüllülərin sağlamlıq vəziyyəti, yaşı, cinsi, bədən kütləsi indeksi (BKİ) və qan təzyiqi haqqında da məlumat toplayıblar. Bu, diabeti aşkarlaya bilən süni intellekt modelinin hazırlanması və sınaqdan keçirilməsi üçün tələb olunurdu.
Süni intellekt alqoritmi şəkərli diabeti olan və olmayan insanlar arasında fərqləri müəyyən etmək üçün səsin yüksəkliyi, intensivliyi və tonu kimi müxtəlif səs xüsusiyyətlərini təhlil edib.
Tədqiqatçılar qeyd ediblər ki, inkişafda iki qabaqcıl üsuldan istifadə edilib: biri altı minə qədər təfərrüatlı vokal xüsusiyyətlərini hesablaya bilər, digəri isə daha mürəkkəb dərin öyrənmə yanaşması, 1024 əsas metoda diqqət yetirir.
Səs alqoritmləri yaxşı ümumi proqnozlaşdırma qabiliyyəti nümayiş etdirib, kişilərdə 71 faiz, qadınlarda isə 66 faiz diabeti düzgün müəyyənləşdirib.
Qeyd olunur ki, model 60 yaşdan yuxarı qadınların, eləcə də arterial hipertenziyalı insanların səs yazılarını təhlil edərkən tapşırığın öhdəsindən ən yaxşı şəkildə gəlib.
Alimlər qeyd ediblər ki, ümidverici nəticələrə baxmayaraq, inkişaf təkmilləşdirmə tələb edir. Onlar ümid edirlər ki, gələcəkdə onların yaratdıqları süni intellekt alqoritmi diabetin erkən diaqnostikasında istifadə oluna bilər.
Nazlı Almuradova