"Azərbaycan xalqının zəngin ailə dəyərləri sırasında övlada yüksək təhsil vermək ön sırada dayanan ənənələrimizdən sayılır. Artıq bu ilki gərgin imtahan dövrünün arxada qalması ilə ixtisas seçimi prosesinə start verilib. Böyük məmnuniyyət hissi ilə abituriyentləri Azərbaycan Dövlət Pedaqoji Universitetinin (ADPU) Quba filialını seçməyə dəvət edirəm". Bu fikirləri SİA-ya açıqlamasında ADPU-nun Quba filialının bu ilki məzunu, Fəridə Hüseynova ifadə edib.
Əvvəlcə məlumat verək ki, məzun Fəridə Hüseynova oxuduğu dövrdə yüksək təhsil nəticələri qazandığı kimi ictimai fəallığı ilə də daim öndə olub. O, 25.01.2024 - 25.03.2024 il tarixində Türkiyənin Ankara şəhərində keçiriləcək "Be Volunteer Be Aware - 2" (Könüllü olun ki, xəbərdar olasınız!) beynəlxalq könüllülük proqramının iştirakçısı olub.
“İbtidai sinif müəllimliyi” ixtisası üzrə bakalavriat pilləsində təhsilini müvəffəqiyyətlə başa vuran Fəridə Hüseynova Qubada ali təhsil almağın bir sıra cəhətlərdən üstün olduğunu belə əsaslandırıb: “ADPU-nun Quba filialında yüksək səviyyəli professor-müəllim heyəti, peşəkar pedaqoqlar tədris aparırlar. Digər tərəfdən filialın zəngin kitabxanası və oxucu üçün münbit şəraiti vardır. Filialın daxili ərazisində yeməkxana və idman şəraiti tələbələrin asudə vaxtının səmərəli keçməsi üçün ciddi əsaslar verir. Burada tələbələrin vaxt itkisi demək olar ki, yoxdur. Çünki filiala gediş-gəliş üçün saatlarla “yol ölçməyə” ehtiyac qalmır. Qubada hər şey bir-birinə yaxın olduğu kimi, yüksək təhsil almaq imkanları da tələbəyə çox yaxındır. Quba gözəl, insanları pakdır".
“Əziz abituriyentlər Qubada təhsil almaq fürsətini qaçırmayın”, - fikri ilə çağırış edən məzun Fəridə Hüseynova deyib: “Əsrarəngiz təbiətin qoynunda, təmiz havada, səfalı meşələrin, sərin bulaqların seyrində Qubada yaşamaq nə qədər gözəldirsə, burada təhsil almağın özü də bir o qədər faydalı və maraqlıdır".