...Tehrandakı İslam İnqilabı Keşikçiləri Korpusunun (SEPAH) komandiri Həsən Həsənzadə qadınlar üçün sərt geyim qaydalarına riayət etmək üçün yeni hüquq-mühafizə strukturunun yaradılmasını elan edib.
Bu xidmətin əməkdaşları, SEPAH rəhbərlərindən birinin dediyinə görə, qadınların ictimai yerlərdə hicab geyinməsini “daha məsuliyyətlə” təmin etmək üçün xüsusi təlim keçiblər. SİA-nın Iran mənbələrindən əldə etdiyi məlumata görə, bu elan İran hakimiyyətinin son günlər əxlaq yoxlanışlarını gücləndirdiyinə dair xəbərlərdən sonra verilib.
...Xatırladaq ki, İranda 2022-ci ilin sentyabrında əxlaq polisi tərəfindən düzgün hicab geyinmədiyi üçün saxlanılan tələbə Məhsa Əmininin həbsdə ölməsindən sonra ölkədə kütləvi küçə etirazları başlamışdı.
Yadınızda olar, etirazlar bir neçə ay davam etdi və onilliklər ərzində İranın mühafizəkar rəhbərliyinə qarşı ən ciddi çağırışlardan birinə çevrildi.
Toqquşmalarda yüzlərlə insan həlak olub, minlərlə insan həbs edilib, bir neçə etirazçı edam edilib. Bəzi nisbətən mötədil İran qanunvericiləri regiondakı hərbi qarşıdurma ilə bağlı gərginlik də daxil olmaqla, mövcud şəraitdə daha sərt rejimə ehtiyac olduğunu şübhə altına alıblar.
Bununla belə, İran Daxili İşlər Nazirliyinin rəhbərliyi geyim koduna riayət etmək üçün yeni tədbirləri və son reydləri dəstəkləyərək bütün bunların “qanun çərçivəsində” edildiyini vurğulayıb.
Ağasəf Babayev