ABŞ dövlət katibi Antoni Blinken Ukraynanın Şimali Atlantika Müqaviləsi Təşkilatına (NATO) qoşulacağını iddia edir. SİA xəbər verir ki, söhbət yalnız bu məqsədə doğru aydın yol xəritəsinin hazırlanmasından gedir.
“NATO müttəfiqlərinin 2023-cü ilin iyulunda Vilnüsdə keçirilən zirvə toplantısında bəyan etdiyi kimi, Ukrayna NATO-ya üzv olacaq. Bizim üçün əsas məsələ bu nəticəyə nail olmaq məqsədilə yaxşı və aydın yol xəritəsi hazırlamaqdır”, - Blinken Fransanın xarici işlər naziri Stefan Sejurne ilə Parisdəki görüşündən sonra birgə mətbuat konfransında danışıb.
ABŞ xarici siyasət idarəsinin rəhbərinin sözlərinə görə, bu yay NATO-nun qarşıdan gələn sammitinin iştirakçıları Ukraynanın alyansa qəbul perspektivlərinin müzakirəsinə böyük diqqət yetirəcək və yuxarıda qeyd olunan yol xəritəsinin necə hazırlana biləcəyini “çox konkret” müzakirə edəcəklər. Blinken bunu “Ukraynanın NATO üzvü olması üçün zəruri olan körpü” adlandırıb.