Türkiyə Prezidenti Rəcəb Tayyib Ərdoğan Qəzzada baş verənlərin qətiyyən müharibə deyil, soyqırım cəhdi olduğunu bildirib. SİA bu barədə Türkiyə saytlarına istinad edir.
III Antalya Diplomatiya Forumunda iştirakçılara müraciət edən Prezident Rəcəb Tayyib Ərdoğan İsrailin oktyabrın 7-dən bəri Qəzzaya təşkil etdiyi hücumlara toxunub.
Rəcəb Tayyib Ərdoğan Qəzzada təkcə uşaqların, qadınların və mülki şəxslərin vəhşicəsinə qətlə yetirilmədiyinə, milyardlarla insanın beynəlxalq sistemə, ədalətə və hüquqa inancının məhv edildiyinə diqqət çəkib.
"Qəzzada baş verənlər qətiyyən müharibə deyil, soyqırım cəhdidir'',-Türkiyə Prezidenti vurğulayıb.
Ərdoğan Beynəlxalq Ədalət Məhkəməsinin İsrailin soyqırımının qarşısını almaq üçün qəbul etdiyi müvəqqəti qərar açıq-aşkar olduğu halda, Benyamin Netanyahu administrasiyasının işğal və qətliam siyasətini davam etdirdiyini vurğulayıb.
"İlk gündən İsraili qeyd-şərtsiz dəstəkləyən qərb dövlətləri ikiüzlü siyasətləri ilə axıdılan qana şərikdirlər. Sözlər əməllə dəstəklənməyincə, Fələstindəki zülmü dayandırmaq, beynəlxalq sistemə inamı bərpa etmək mümkün deyil. Beynəlxalq ictimaiyyət Fələstin xalqına olan borcunu ancaq Fələstin dövlətinin qurulması ilə ödəyə bilər. Bunun üçün 1967-ci il sərhədləri daxilində, paytaxtı Şərqi Qüds olan, müstəqil, suveren və coğrafi cəhətdən inteqrasiya olunmuş Fələstin Dövlətinin qurulması vacibdir. Bu məqsədlə zəmanət də daxil olmaqla, məsuliyyəti öz üzərimizə götürməyə hazır olduğumuzu bəyan etmişik”.
Prezident Ərdoğan bir daha beynəlxalq ictimaiyyəti Qəzzaya və Fələstin məsələsinə səmimi dəstək verməyə dəvət edib.