Astronomlar Neptun və Uranın ətrafında əvvəllər məlum olmayan peykləri aşkar ediblər.
Günəş sistemində əvvəllər naməlum olan peyklər Havay və Çilidə teleskoplar vasitəsilə görülüb.
SİA-nın xarici qaynaqlardan əldə etdiyi məlumata görə, Astronomlar Neptunun ətrafında fırlanan 2 peykdən başqa Uranın ətrafında daha bir kiçik peykin olduğunu aşkar ediblər.
Beynəlxalq Astronomiya Birliyi yeni kəşflərlə Neptunun peyklərinin sayının 16-ya, Uranın isə 28-ə yüksəldiyini açıqlayıb.
Vaşinqtondakı Karnegi Elmi İnstitutunun astronomu Skot Şepard (Scott Sheppard) kiçik peykin təxminən 27 il ərzində Günəşdən ən uzaq buzlu planet olan Neptun ətrafında bir orbitini tamamladığını söyləyib: “Yəqin ki, hələ kəşf edilməmiş çoxlu kiçik peyklər də var.”
Güman edilir ki, Uran ətrafında fırlanan və təxmini diametri 8 kilometr olan yeni peyk planetin peykləri arasında ən kiçiyidir.