2024-cü ildə Almaniyada keçiriləcək futbol üzrə Avropa çempionatının mükafat fondu açıqlanıb.
SİA-nın AZƏRTAC-dan əldə etdiyi məlumata görə, iştirakçı komandalara veriləcək məbləğ “Avro-2020” ilə eyni səviyyədə, yəni, ümumilikdə 331 milyon avro olaraq təsdiqlənib.
İştirak haqqı 9,25 milyon avro təşkil edir. Hər qələbəyə görə 1 milyon, heç-heçəyə görə 500 min avro ödəniləcək.
Səkkizdəbir finala vəsiqə əldə edən yığmaların hər biri 1,5 milyon avro qazanacaq. Dörddəbir finala çıxan kollektivlər 2,5 milyon, yarımfinalın iştirakçıları 4 milyon avro alacaqlar.
Finalda uduzan komandaya 5 milyon, Avropa çempionuna isə 8 milyon avro mükafat veriləcək.
Çempion komandanın hər üç qrup matçında qalib gələcəyi təqdirdə, əldə edə biləcəyi maksimum gəlir 28,25 milyon avro olacaq.
Qeyd edək ki, Avropa çempionatı iyunun 14-dən iyulun 14-dək Almaniyanın 10 şəhərində keçiriləcək.