“Səbail” tarixinin ən böyükhesablı kubok qələbəsini qazanıb. SİA Peşəkar Futbol Liqasının rəsmi saytına istinadən xəbər verir ki, Şahin Diniyevin yetirmələri buna Azərbaycan Kubokunun 2023-2024-cü illər mövsümünün II təsnifat mərhələsində “Şəfa”nı 7:0 hesabı ilə məğlub etməklə nail olub. Bu, həm də “dənizçilər”in tarixində bütün turnirlər nəzərə alınmaqla ən böyükhesablı səfər qələbəsinin təkrarıdır.
Bakı klubu I divizionda oynadığı 2016-2017-ci illər mövsümündə də rəqib meydanında 7 top fərqi ilə qalib gəlib.
2017-ci il fevralın 22-də “Səbail” “Göyəzən”lə səfər matçında indiki kimi 7 cavabsız qolla üstün olub. Həmin rekordu təxminən 6 il 9 aydan – 2470 gündən sonra təkrarlayan paytaxt təmsilçisi tarixinin üç ən böyükhesablı qələbəsindən birini bayram edib.
“Səbail” tarixinin ən böyük qalibiyyəti də I divizionda qeydə alınıb. Paytaxt klubu “Bakılı”nı 11:3 hesabı ilə məğlub edib. 2016-cı il noyabrın 24-dəki həmin rekord fərqin təkrarlanması üçün bir top çatmayıb.