Nadir İsrafilov sözlərinə belə davam edib: “Bəzi tədqiqatlara əsasən qarşıdakı onilliklərdə bir çox iş və xidmət avtomatik olaraq robotlar və kompüter tətbiqləri vasitəsi ilə görüləcək. Nəqliyyat, logistika, ofis və inzibati dəstək kimi işlərin avtomatlaşdırma yolu ilə aparılması nəzərdə tutulur. Bir sözlə bəzi peşələrin avtomatlaşdırılması, bəzilərinin robotlaşdırılması gözlənilir. Belə görünür ki, hansı peşənin seçilməsindən asılı olmayaraq, informasiya texnologiyaları bütün peşələrin əsasını təşkil edəcək və bütün iş proseslərinə təsir edəcək. Ona görə proqramçılar həmişə axtarılan kadr olacaqlar. Başqa sözlə, biliyin özünü deyil, onun öyrənmə metodunu bilən və analitik sintez qabliyyəti olan mütəxəssislərə ehtiyac yaranacaq.
Araşdırmalara görə, gələcəkdə texnologiya və kompüter elmləri ilə birləşməyən bir peşə olmayacaqdır. Buna görə də, artıq yeni vəziyyətlərə uyğunlaşmaq, problemi həll edə bilən, alqoritmik düşüncəya sahib olan, özünə güvənən, birlikdə işləmək, ünsiyyət bacarığı yüksək olan mütəxəssis hazırlanması getdikcə zərurətə çevrilir.
Bir çox peşələrin avtomatlaşdırılması və robotlaşdırılması nəticəsində işsişliyin qaçılmaz olacağı da gözləniləndir. Buna görə də yaxın illərdə məşgulluğun artması istiqamətində aparılan işlər daha da genişləndirilməlidir. Peşə təhsili ilə orta ixtisas təhsilli üzrə müasir tələblərə cavab verən mütəxəssislərin hazırlığına diqqət artırılmalı, ali təhsilli mütəxəssis hazırlığı üçün ali təhsil ocaqlarında rəqəmsal bacarıqların artırılması və programlaşdırma üzrə mütəxəssis hazırlığı prioritet istiqamət olmalıdır”.