“Göz almasının uzunluğunun artması genetik ola və yeniyetmə yaşda irəliləyə bilər. Bu miopiyanın (yaxındangörmənin) bir növü olan ox miopiyasıdır”. Bu sözləri SİA-ya açıqlamasında Cərrah oftalmoloq Humay Əlizadə deyib.
Onun sözlərinə görə, bu zaman gözə düşən şüalar tor qişaya deyil, ondan önə düşərək görmənin zəifləməsinə və həttə ağır hallarda miopiya xəstəliyinə (tor qişada miopik xorioretinopatiya, miopik konus, stafiloma, distrofiyalara, tor qişanın incəlməsi, makulyar ödem, yırtıq və qopma) qədər gətirib çıxara bilər: “Genetik xəstəliklərdən biri də toyuq korluğu kimi tanınan Retinitis pigmentosa xəstəliyidir. Bəzi insanlarda genetik olaraq çöpcüklər, yəni gecə görməni təmin edən, qaranlıq və dumanlı havada görməni təmin edən reseptorların sayı normadan az olur və bu insanlar loş işıqda, qaranlıq havada, qaranlıq məkanlarda rahat hərəkət edə bilmirlər, hətta bəzən heç hərəkət edə bilmirlər.
Anadangəlmə Leber amavrozu (korluğu) torlu qişa zülallarını, o cümlədən opsini kodlaşdıran 18 genin mutasiyasının səbəb olduğu heterogen qrup xəstəlikləri özündə cəmləyir”.
Humay Əlizadə sözlərinə belə davam edib: “El arasında “Qara su” kimi tanınan qlaukoma xəstəliyi, yüksək göz daxili təzyiq nəticəsində görmə sinirinin zədələnməsi, bununla da xəstənin görmə sahəsinin tədricən daralması və müalicə olunmadığı təqdirdə görmənin geridönməz itiriməsinə səbəb olan xəstəlikdir. İrsi meyillik yüksək dərəcədə olub yaxın ailə üzvlərində qlaukoması olanlarda 8 dəfə artıq rastlanır”.
Ayşən Vəli