Beləliklə, sonsuz mavilikdə yeni marşrutla səyahətimizə davam edirik.
Göydə ağ buludlar, dənizdə köpüklü dalğalar! Dənizdə olanda həyatın təlaşından uzaqlaşıb xəyallara qərq olursan. Dənizdə olmaq başqa bir dünyada yaşamaq kimidir. Düşünürəm ki, dənizdə olanda zaman başqa cür keçir. Keçən həftə sizi Sakaryanın təbii gözəlliklərini gəzəcəyimizi söyləmişdik. Buyurun Sakaryanın fərqli təbiətini birlikdə kəşf edəyin. Bu həftəki səfər yaylası, gölü, Longoz (Subasar) meşəsi və şəlaləsi ilə tam təbiət gəzintisi olacaq. Təbii ki, bunun üçün sahildən bir az uzaqlaşmalı olacağıq. SİA bu barədə Tükiyə saytlarına istinad edir.
Qayığımızı Sakarya çayının dənizə töküldüyü Karasuda lövbər salırıq. Türkiyənin ikinci ən uzun sahili Karasuda yerləşir və burada çoxlu çimərliklər var. Karasu incə qumdan ibarət çimərliyi ilə diqqət çəkir. Yubanmadan Sakaryanın təbii gözəllikləri ilə seçilən Maden çayına getməyə başlayaq. Maden çayı adını buradakı faydalı qazıntı yataqlarından götürüb. Osmanlı İmperatorluğunun son dövrlərində buradan qurğuşun, sink kimi minerallar hasil edilirdi. Əgər biz mədən üçün açılan tunelləri və faydalı qazıntıların daşınması üçün istifadə olunan relsləri görməsəydik, bir vaxtlar burada faydalı qazıntıların çıxarıldığına inanmaq çox çətin olardı. Çünki bu gün buradan hər iki sahili yam-yaşıl ağaclarla örtülmüş təmiz bir çay axır, axan çayın səsinə quş səsləri qarışır. Hətta bir az irəlidə dərədən keçib çata biləcəyimiz bir şəlalə var. Maden çayı təbiətin insan müdaxiləsi olmadan özünü yeniləyə biləcəyinin canlı sübutudur.
Bu füsunkar təbiəti tərk edərək, indi başqa bir füsunkar əraziyə gedirik. Bu, Acarlar subasar yeridir. Heyvan və bitki aləmi ilə zəngin, meşələrlə bataqlıqların bir-birinə qarışdığı bir yerdir. Acarlar subasar düzənliyi Türkiyənin ən böyük tək parçalı subasar meşəsidir. Ola bilsin ki, daha əvvəl subasar meşəsi haqqında eşitməmisiniz. Bu tip meşələr çox xüsusi yerlərdir. Çayların daşıdığı gil, qum və çınqılların suyun dənizə axdığı yerdə bənd əmələ gətirməsi nəticəsində su yığılmağa başlayır. Dibi su ilə örtülü olan belə ərazilərə “Lonqoz (Subasar) meşəsi” deyilir. Amazon və Konqo hövzəsi istisna olmaqla, dünyada böyük subasar meşələri qalmayıb. Məhz buna görə də bu meşələr əhatə etdiyi ərazinin ölçüsündən asılı olmayaraq qorunur. Bataqlıqları, gölləri və təpələri ilə möhtəşəm bir ekosistemə ev sahibliyi edir. Acarlar subasar meşəsi də mühafizə altındadır. Ona görə də onun yalnız kiçik bir hissəsi görməli yerləri gəzmək üçün yararlı hala salınıb. Bu taxta platformada gəzməklə, subasardan 750 metr irəli gedə bilərsiniz. Suda ağacları, nağıl effekti yaradan su zanbaqları, nadir su bənövşələri və nəsli kəsilməkdə olan növlərlə bu fərqli dünyaya daha yaxından nəzər salaqmı?
Əminəm ki, bu təsirli təbiət yerində çoxlu gözəl fotolar çəkmisiniz. İndi gedəcəyimiz Sapanca gölü ilin bütün fəsillərində bənzərsiz mənzərələr təqdim edir. Bəzi ekspertlər gölün bir vaxtlar Türkiyənin şimal-qərbində yerləşən Mərmərə dənizinin uzantısı olduğunu deyirlər. Onlar bildirirlər ki, beş min il ərzində bölgədəki tektonik hərəkətlər nəticəsində Mərmərə dənizindən ayrılaraq müstəqil bir gölə çevrilib. Deməli, Sapanca gölü tektonik göldür. Sapanca gölü milli və beynəlxalq su idman yarışlarına ev sahibliyi edir. Burada sörfinq, yelkən və avarçəkmə idmanlarına maraq göstərən həvəskarları görmək mümkündür. Təbii ki, təkcə idman həvəskarları deyil, Sapanca gölünə üstünlük verənlər. İncə qumu ilə seçilən Uzunkum çimərliyində istədiyiniz kimi üzə, kanoe gəzintilərinə çıxa və ya balıq ovu turlarında iştirak edə bilərsiniz.
Yamac paraşütü, gəzinti və düşərgə həvəskarlarının üstünlük verdiyi Karagöl yaylası, toxunulmaz təbiəti və firuzəyi rəngli çayı ilə Harkköy kanyonuna getmək üçün vaxtımız qalmadı. Ayrıca Sakaryada görülə biləcək təbii gözəlliklər bu iki məkanla məhdudlaşmır. Sakaryada gündəlik həyatın xaosundan uzaqlaşmağa imkan verəcək bir çox başqa diqqəti çəkən yerlər var.