Yeni Azərbaycan Partiyası İmişli rayon təşkilatında rus icmasının nümayəndələri ilə görüş keçirilib. SİA xəbər verir ki, görüşdə YAP İmişli rayon təşkilatının sədri Səfa Ağayev, “Aran” Enerji Təchizatı və Satışı İdarəsinin rəis müavini, “Energetik-1” ərazi partiya təşkilatının sədri Saleh Səmədov, İmişli rayon İcra Hakimiyyəti Başçısının birinci müavini Mirzə Quliyev, Rus Mədəniyyət Mərkəzinin direktoru Qalina Manafova, Xətai rayonu üzrə Rus İcmasının direktoru, Sosial Məsələlər və Xeyriyyə Komissiyasının sədri Marina Pavlova, rayon rus icmasının rəhbəri Beteva Lyudmila və icma nümayəndələri, partiya fəalları iştirak ediblər.
İlk olaraq YAP İmişli rayon təşkilatının foyesindəki Ümummilli lider Heydər Əliyevin büstü qarşısına gül dəstələri qoyularaq ruhuna ehtiram ifadə olunub.
Tədbiri giriş sözü ilə açan YAP İmişli rayon təşkilatının sədri Səfa Ağayev Ulu öndər Heydər Əliyev tərəfindən qoyulan millətlərarası münasibətlərindən bəhs edib, ölkəmizdə tolerantlıq, multikultiralizm ənənələrinin qorunub saxlanılması və inkişaf etdirilməsi istiqamətində həyata keçirilən dövlət siyasətindən danışıb.
Çıxış edən “Energetik-1” ərazi partiya təşkilatının sədri Saleh Səmədov bildirib ki, ölkəmizdə azərbaycanlılarla birgə yaşayan digər millətlərin, o cümlədən rusların da milli-mənəvi dəyərlərinin, adət-ənənələrin qorunub saxlanmasına və inkişaf etdirilməsinə böyük qayğı göstərilir.
Çıxış edən İmişli rayon İcra Hakimiyyəti Başçısının birinci müavini Mirzə Quliyev qeyd edib ki, yüz illər boyu etnik-dini tolerantlıq ənənələrinin qorunub saxlandığı Azərbaycan cəmiyyətində ayrı-ayrı xalqlar, dinlər və etiqadlar arasında qarşılıqlı hörmət, etimad və qardaşlıq münasibətləri mövcud olub.
Çıxış edən Rus Mədəniyyət Mərkəzinin direktoru Qalina Manafova, Xətai rayonu üzrə Rus İcmasının direktoru Marina Pavlova və İmişli rayonunda rus icmasının sədri Lyudmila Beteva tolerantlığı ilə bütün dünyada tanınan Azərbaycanda yaşayan ruslar üçün hər cür şəraitin yaradıldığını, azərbaycanlılarla bərabər rusların da ölkənin ictimai-siyasi, sosial və mədəni həyatında fəal iştirak etdiyini, dərin köklərə bağlı Azərbaycan-Rusiya dostluğunun bu gün də uğurla davam etdirildiyini bildiriblər.
Çıxış edən YAP fəalı Kamran Səmədov qeyd edib ki, Azərbaycanda tolerantlığın bərqərar olunmasında ümummilli lider Heydər Əliyevin xidmətləri misilsizdir və hazırda bu siyasət dövlətimizin başçısı tərəfindən davam etdirilir.
Digər çıxış edən icma üzvləri hər cür qayğı ilə əhatə olunduqlarını vurğuladılar. Onlara göstərilən diqqət və qayğıya görə ölkə Prezidenti cənab İlham Əliyevə minnətdarlıqlarını ifadə etdilər.
Görüşün sonunda rus icmasının nümayəndələrinin uşaqlarına hədiyyələr təqdim edilib.
Tədbirin rəsmi hissəsindən sonra YAP İmişli rayon təşkilatının təşkilatçılığı ilə təmir-bərpa işləri aparılan vəfat edən rus icması üzvlərinin dəfn edilməsi üçün ayrılmış qəbiristanlığa baxış keçirilib.