Yaponiya və NATO Vilnüs sammitində yeni tərəfdaşlıq proqramı haqqında razılığa gəliblər. SİA Reuters agentliyinə istinadən xəbər verir ki, bunu Yaponiyanın baş naziri Fumio Kişida bildirib. Kişida NATO-nun baş katibi Yens Stoltenberqlə birgə bəyanatında bildirib ki, o, kibertəhlükəsizlik də daxil olmaqla yeni sahələrdə əməkdaşlığı daha da inkişaf etdirməyi səbirsizliklə gözləyir və Hind-Sakit Okean regionu ilə əlaqəsini artırdığı üçün NATO ilə əməkdaşlığı dərinləşdirməyə ümid edir.
Yeni tərəfdaşlıq proqramı NATO-nun Asiya ilə daha dərin əlaqələri araşdırdığı, Çin isə hərbi mövcudluğunu artırdığı bir vaxta təsadüf edir. Stoltenberq açıqlamada NATO-nun Çinin hərbi gücünü çoxaltmasından və nüvə qüvvələrini genişləndirməsindən narahat olduğunu bildirib və həmçinin Şimali Koreyanın raket buraxılışını pisləyib.
“Heç bir tərəfdaş NATO-ya Yaponiya qədər yaxın deyil” deyən baş katib Avropanın Asiya üçün əhəmiyyəti qədər Asiyanın da Avropa üçün əhəmiyyət kəsb etdiyini bildirib.
Çin NATO-nun Vilnüsdə keçirilən iki günlük sammiti zamanı dərc etdiyi kommünikedə Çinin hərbi ittifaqın maraqlarına, təhlükəsizliyinə və dəyərlərinə meydan oxuduğunu iddia edib. Çin NATO-nun Asiya-Sakit Okean regionuna şərqə doğru hərəkətinə qarşı olduğunu bildirib və Pekinin hüquqlarını təhdid edən istənilən addımın qətiyyətlə cavablandırılacağı ilə bağlı xəbərdarlıq edib.