“Azərçay” “Çay şəhərciyi"ndə ölkəmizi təmsil edəcək

17 Sentyabr 2019 07:13 (UTC+04:00)

“Dövlət Aqrar Ticarət Şirkəti” MMC və “Azərsun Holdinq” Şirkətlər Qrupu “Azərçay” brendi ilə Parisdə Sen-Sülpis (Saint Sulpice) meydanında sentyabrın 27-dən 29-dək keçiriləcək “Çay şəhərciyində ölkəmizi təmsil edəcəklər. SİA xəbər verir ki, “Çay şəhərciyin”də iştirak edən şirkətlər ölkələrində becərilən çay bitkisi, onun mənşəyi, rəngi, növləri, çay ritualları, eləcə də çayın orqanizmə faydaları haqqında məlumat vərəcəklər.

Azərbaycanı təmsil edəcək hər iki şirkət ziyarətçilərə ölkəmizdə becərilən və istehsal olunan çay növləri, onun tərkibinin zənginliyi, milli çay mədəniyyətimiz və çay süfrəsi haqqında danışacaqlar. Şəhərcikdə ziyarətçilərin milli çayımızın ətri və tamı ilə tanış olmaq, eləcə də şirkətlərimizin öz məhsullarını təşviq etmək imkanı olacaq.

Bu gün dünyada 35 ölkə çay istehsal edir. Çin (1.7 milyon ton), Hindistan (1 milyon ton), Kenya (369 min ton), Şri-Lanka (300 min ton), Türkiyə (225 min ton), Vyetnam (217 min ton) və Yaponiya (84800 ton yaşıl çay) çay istehsalına görə ön sıradadırlar.

Fransada ildə 20 min ton çay istehlak olunur və çayın illik dövriyyəsi 251.2 milyon avrodur.

Qeyd edək ki, bu gün dünyada hər saniyədə 10 min fincan çay içilir.