Masallıda pomidor sahələrinə ziyanvericilər daraşıb

18 İyun 2019 16:50 (UTC+04:00)

Masallı rayonunda pomidor sahələrində xəstəlik yayılıb. Xəstəlik bu sahələrə ziyanverici qurdların daraşmasından sonra baş verib. 10 gündən çoxdur ziyanverici həşəratlar sahələrdə məhsulu zay edir. SİA xəbər verir ki, Masallının 3 kəndində - Qızılağac, Gəyəçöl və Sərçuvar kəndlərində fermerlərə ziyan dəyib.

Rayon Bitki Mühafizəsi Mərkəzindən bildirilib ki, yayılan xəstəliklə əlaqədar mütəxəssislər nümunələr götürüb və xəstəliyin nə olduğu tam müəyyən edilib. Ziyanverici el arasında pomidor sovkası adlanan qurddur. Sakinlərin dediklərinə görə, pomidor sovkası çox vaxt qırmızı yetişmiş pomidorlarda olardı, lakin maraqlısı budur ki, yetişməmiş kal pomidorlarda da var. Fermer Bəybala Əsədov: “4 hektar pomidor sahəm var. Ziyanverici sovkalar mənim pomidor sahələrimin 1 faizini zəbt edib. Bu məni çox narahat edir. Dərmanlama işlərinə başlamışam. Bitki Mühafizə Mərkəzinin əməkdaşlarına məlumat vermişəm. Onlar ərazidə olan sovka dəyən pomidorlara baxış keçiriblər”.

Aprel-may aylarında dişi kəpənəklər bitkilərdə öz yumurtalarını qoyur. Hava şəraitinə uyğun olaraq 10-15 gün müddətində yumurtadan çıxan tırtıllar pomidorun meyvəsinə ziyan vurur. Vaxtında qarşısı alınmadıqda isə sovka tamamilə yayıldığı sahəni məhv edə bilir. Fermerlərin pomidor sahələrinə Masallı Rayon Bitki Mühafizəsi Mərkəzinin əməkdaşları da baxış keçirib. Masallı Rayon Bitki Mühafizəsi Mərkəzinin rəsmisi İslam Məmmədov: “Biz sovka yayılan ərazilərdə müşahidə aparmışıq. Fermerlərə öz tövsiyəmizi vermişik, hansı kimyəvi dərmanlara ehtiyac olduğunu bildirmişik. Sovka karantin ziyanvericisi olmadığı üçün onunla mübarizə fermerlərin özləri tərəfindən aparılır”. Fermer Dilarə Əsədovanın 3 hektar pomidor ərazisində də bu problem yaşanır: “Sahəmə gəlib baxıblar. Bizə dərman adları verilib. Alıb gətirmişik, iki gündür dərmanlayırıq. İnanıram ki, məhsulumuzu vaxtında zərərvericilərdən qoruya biləcəyik”.

Xəstəliyin genişlənməməsi üçün zərərvericilərin yumurta qoyub çoxalmasına imkan verməmək lazımdır. Havaların isti keçməsi, alaq otlarının təmizlənməməsi və kortəbii dərmanlama da xəstəliyin artmasına səbəb olur. Artıq fermerlərə lazımi tövsiyələr və zəruri dərman preparatları ilə bağlı məlumatlar verilib. Xəstəliyin yaxın vaxtlarda tam aradan qaldırılması üçün hazırda sahələrdə dərmanlama işləri aparılır.