“Talassemiyasız həyat naminə” simpozium və ödənişsiz müayinələr

6 Aprel 2019 15:56 (UTC+04:00)

Bu gün Bərdə şəhərində “Talassemiyasız həyat naminə” 6-cı regional elmi simpozium keçirilib. SİA-nın bölgə müxbiri xəbər verir ki, “Regional İnkişaf” İctimai Birliyi (RİİB) və Talassemiya Mərkəzinin birgə təşkilatçılığı ilə keçirilən tədbirdə Bərdə və ətraf rayonların səhiyyə işçiləri, talassemiya daşıyıcısı olan ailələrdən nümayəndələr və QHT təmsilçiləri iştirak ediblər.

Talassemiya Mərkəzinin icraçı direktoru Valeh Hüseynov çıxışında ölkədə səhiyyə sahəsində aparılan islahatlar, həmçinin Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə yaradılan və 10 il əvvəl istifadəyə verilən Talassemiya Mərkəzinin fəaliyyəti haqqında məlumat verib. Vurğulanıb ki, tibbi xidmətin təkmilləşdirilməsi istiqamətində aparılan islahatlar və maddi-texniki bazanın gücləndirilməsi bu xəstəliyin müalicəsində və profilaktikasında mühüm rol oynayır.

Bildirilib ki, Talassemiya Mərkəzi və RİİB indiyədək Mingəçevir, Qax, Şirvan, Lənkəran və Qubada “Talassemiyasız həyat naminə” şüarı ilə regional simpozium və ödənişsiz tibbi müayinələr təşkil edib.

Bərdə Rayon İcra Hakimiyyəti başçısının müavini Fəqət Şadlinskaya ölkəmizin müxtəlif bölgələrində “Talassemiyasız həyat naminə” şüarı ilə keçirilən simpoziumların və ödənişsiz tibbi müayinələrin əhəmiyyətini yüksək qiymətləndirib və regional simpoziumun işinə uğurlar arzulayıb.

Daha sonra simpozium elmi sessiyalarla davam edib, talassemiya ilə bağlı müxtəlif mövzularda məruzələr dinlənilib və müzakirə edilib. Sonda iştirakçılara sertifikatlar təqdim olunub.

Tədbir çərçivəsində Bərdə şəhərində talassemiya daşıyıcılığının müəyyən edilməsi məqsədilə ödənişsiz tibbi müayinələr də təşkil edilib.