“Bu siyasəti cənab Prezidentimiz uğurla həyata keçirir" ÖZƏL-RƏY

15 Noyabr 2018 14:40 (UTC+04:00)

“Bu il Azərbaycan Prezidenti cənab İlham Əliyev tərəfindən çox mühüm addımlar atılıb. Dövlət başçısı ölkənin xaricdə beynəlxalq səviyyədə nüfuzunun daha da artırılması üçün böyük işlər görüb. Qeyd edə bilərik ki, həm ikitərəfli, həm də çoxtərəfli çox böyük layihələr həyata keçirilib. Buna misal olaraq Cənub-Şimal layihəsini, TAP, TANAP layihələrini və s. göstərə bilərik”. Bunu SİA-ya açıqlamasında millət vəkili Aytən Mustafayeva deyib.

Onun sözlərinə görə, bunlar hamısı Azərbaycanın iqtisadi cəhətdən nəinki inkişafı, eləcə də onun təşəbbüskarı və vəsait qoyan investor ölkə kimi də dünyada tanıdır: “Davosda keçirilən görüşlər və orada iqtisadi baxımından ayrı-ayrı sahələrə aid verilən reytinqlər də Azərbaycanın xeyli irəlilədiyini göstərdi. Təbii ki, bu da cənab Prezidentin yürütdüyü siyasətin, ölkədə icraçılar qarşısında qoyduğu vəzifələrin icrası ilə bağlı əldə olunan nailiyyətlərin göstəricisidir. Həmçinin beynəlxalq siyasətdə Azərbaycanın çox uğurlu rol oynaması onu təsdiq edir ki, ölkəmizin düşünülmüş, balanslaşdırılmış siyasəti yüksələn xəttlə inkişaf edir. Azərbaycanın müharibə şəraitində olmasına baxmayaraq ölkəmiz geostrateji baxımından həm barışdırıcı, həm də birləşdirici rolu müvəffəqiyyətlə oynamaqdadır. Eləcə də ikitərəfli görüşlər də göstərir ki, Azərbaycanın Rusiya, İran, Avropa ölkələri ilə əlaqələri inkişaf etməkdədir. Bu siyasəti cənab Prezidentimiz uğurla həyata keçirir. Bu bizim üçün çox müsbət bir göstəricidir”.