"Ölkəmizə qayıtdıqdan sonra Azərbaycan xalçalarını təbliğ edəcəyik"

8 Avqust 2018 16:55 (UTC+04:00)

Ölkəmizdə yaradılan müasir turizm infrastrukturu, bölgələrimizin sabitlik adasına çevrilməsi buraya gələn turistlərin sayını xeyli artırıb. Azərbaycana gələn turistlərin ziyarət etdiyi ünvanlar sırasında “Azərxalça” Açıq Səhmdar Cəmiyyətinin (ASC) filialları da yer alır. Qurumun fəaliyyət göstərən filiallarında sərgi-satış salonları yaradılıb ki, bu da xalça istehsalı emalatxanalarını turistlər üçün daha cəlbedici edir.

Qəbələ ölkəmizin əsas turizm mərkəzlərindən biridir. Hər gün bu rayona yüzlərlə turist gəlir. Həmin insanların turizm marşrutunda “Azərxalça”nın Qəbələ filialı da olur. Təkcə ötən həftə bu filialı onlarla turist ziyarət edib. Turistlərə Azərbaycan xalçaçılığı, Qəbələdəki emalatxanada toxunan xalçalar barədə geniş məlumatlar verilib.

“Azərxalça”nın Qəbələ filialında olan turistlərdən biri də Oman vətəndaşı Abdullah El-Mahrukidir. O, emalatxanada toxunan xalçalarla tanış olduqdan sonra buradan bir xalça alıb.

“Azərxalça” ASC-nin mətbuat xidmətindən SİA-ya bildirilib ki, omanlı qonaq açıqlamasında Azərbaycan xalçalarının onu heyran etdiyini bildirib: “Mən öz ailəmlə Azərbaycanı görməyə gəlmişəm. Sizin çox abad şəhərləriniz, müasir turizm infrastrukturunuz var. Azərbaycanlılar həm çox qonaqpərvərdirlər, həm də tarixi köklərinə və milli dəyərlərinə bağlıdırlar. Səfər etdiyimiz şəhərlərdə bizə tarixi yerləri, xalqınızın mədəniyyətini nümayiş etdirən obyektləri görməyi məsləhət bilirlər. Bu, onu göstərir ki, Azərbaycan xalqı öz zəngin mədəniyyətini, dəyərlərini təbliğ etməkdə maraqlıdır”.

Abdullah El-Mahruki dünyanın xalça istehsal edən bir neçə ölkəsində olduğunu, ancaq heç yerdə belə xalçalar görmədiyini deyib: “Biz Qubadakı xalça fabriki ilə də tanış olmuşuq. Xalça fabriklərinizdə istehsal olunan məhsullar mənim çox xoşuma gəldi. Toxucular mükəmməl sənət əsərləri yaradırlar. Azərbaycan xalqı bütün bu işləri ilə haqlı olaraq fəxr edir. Sizin xalçalarınızın çox zəngin və mənalı naxışları vardır. Biz anlamasaq da, bilirik ki, o naxışlar nəsə deyir. Ölkəmizə qayıtdıqdan sonra Azərbaycan xalçalarının təbliğatçısına çevriləcəyik. Çünki Azərbaycan xalçaları həm dekorativ cəhətdən gözəldir, həm də keyfiyyətlidir. Burda bizə məlumat verdilər ki, xalçalar təmiz qoyun yunundan hazırlanmış, təbii boyalarla boyanmış iplərlə toxunur. Bu da sağlamlıq deməkdir. Kim istəməz ki, öz evində sağlamlığa mənfi təsir göstərməyən əşyalar olsun. Belə fabriklər yaradan dövlətiniz təkcə iş yerləri açmayıb, eyni zamanda hər bir vətəndaşının sağlamlığının qeydinə qalıb”.

Omanlı qonaq yenidən ölkəmizə səfər edəcəyini söyləyib.