Xaçmaz Regional Mədəniyyət İdarəsi tərəfindən regionda dekorativ-tətbiqi sənət növləri ilə məşğul olan sənətkarların əl işlərinin sərgisinə start verilib. Ümummilli Lider Heydər Əliyevin 95 və Azərbaycan Xalq Cümhuriyyətinin 100 illiyinə həsr edilmiş belə sərgilərin keçirilməsində əsas məqsəd bu sənət növlərinin yaşadılması, inkişaf etdirilməsi və gələcək nəsillərə ötürülməsidir.
SİA-nın məlumatına görə, ilk sərgi Xaçmaz Dövlət Rəsm Qalereyasında Metal üzərində bəddi döymə ustası Zeydulla Ağayevin əl işlərindən ibarət sərgi təşkil edilib. Tədbiri giriş sözü ilə açan Xaçmaz Regional Mədəniyyət İdarəsinin rəisi Nazim Ağayev regionda dekorativ-tətbiqi sənət növünün yaşadılması və inkişafı məqsədilə regional idarə tərəfindən xüsusi layihə hazırlandığını və gələcəkdə sənətkarların əl işlərinin satışı məqsədilə sərgi-satış mərkəzlərinin yaradılmasının nəzərdə tutulduğunu bildirib. Həmçinin bu sənət növlərinin gələcək nəsillərə ötürülməsi məqsədilə dərnəklərin yaradılmasının vacibliyini xüsusi qeyd edib.
Daha sonra çıxış edən Xaçmaz Rayon İcra Hakimyyətinin Başçısının 1-cü müavini İlhamə Nəzərova belə sərgilərin keçirilməsinin sənətkarların fəaliyyətinə xüsusi təkan verəciyini açıqladı və Z.Ağayevə fəaliyyətində uğurlar arzulayıb.
Daha sonra Zeydulla Ağayevə Xaçmaz Regional Mədəniyyət İdarəsinin Fəxri fərmanı və hədiyyə təqdim edildi. Sonda sərgiyə baxış keçirilib.
Belə sərgilərin növbəti günlərdə regiona daxil olan Quba, Qusar, Şabran və Siyəzən rayonlarında da təşkil edilməsi nəzərdə tutulub.