Tərlan Əhmədov: "Bacardığımız qədər irəli getmək istəyirik" - MÜSAHİBƏ

SİA “Keşlə” futbol klubunun baş məşqçisi Tərlan Əhmədovun müshaibəsini təqdim edir:

- Fasilə ərəfəsində hazırlıq necə gedir?

- Dörd futbolçumuz yığma komandadadır. Onlarsız hazırlaşırıq. Ehtiyatda olan və əvəzedicilərdən dəvət etdiyimiz futbolçularla “Qaradağ Lökbatan”a qarşı oynadıq. Sabahdan “Qəbələ” ilə oyunun hazırlıqlarına başlayacağıq.

Image may contain: 1 person, standing, stadium and outdoor

- Fasilə komandaya faydalı olacaqmı?

- O faydanı heç kim deyə bilməz. Hər komandada oyun problemləri var. Bu fasilədən də çalışırıq ki, səmərəli istifadə edək. Yəqin ki, xeyrimizə olan amil olar.

- Kamran Ağayev zədə səbəbindən millidən kənarda qaldı. Davud Kəriminin isə atası vəfat edib. “Keşlə” qapıçı problemi ilə üz-üzə qalıb. Bu durumu necə çözəcəksiniz?

- Həyatda heç kim heç nədən sığortalanmayıb. Hamının borcudur ki, milli komandaya futbolçu versin. Əlbəttə, Kamran həm yığma, həm də bizim üçün ciddi itkidir. Allah Davudun atasına rəhmət eləsin. Əlimizdə nə olsa, istifadə edəcəyik. Belə şeylərə hazır olmalıyıq. Həyatda zədələr və itkilər qaçılmazdır.

- Şahin Zəkiyevi Premyer Liqaya hazır qapıçı kimi görürsünüz?

- Hələ məsələni o dərəcədə fikirləşmirəm. Kamranın zədəsinin nə qədər ciddi olduğunu və Davudun həyata necə baxdığını bilmirəm. Əlimizdə nə olsa, onu edəcəyik. Lazım gəlsə, qapı Şahinə həvalə olunacaq.

Image may contain: one or more people, people playing sports and outdoor

- Avropa səhnəsinə ən qısa yol kubokdan keçir. “Keşlə” 1/8 finalda “Şüvəlan”ı keçsə “Qarabağ”la qarşılaşacaq. Tanış komandaların rəqib olması sizin üçün mənzərədi?

- Bəli, kubokdan yol qısadı. Elə bir komanda yoxdur ki, məğlubedilməz olsun. Çempionatda tez-tez üz-üzə gəlirik. Rəqiblərə hörmətlə yanaşırıq. İstəyirik ki, hər iki cəbhədə uğurlu çıxış edək. Premyer Liqada üst yerlərə qalxmaq və kubokda bacardığımız qədər irəli getmək istəyirik. Bizim oyunlar göstərir ki, kollektiv olaraq, heç kimdən zəif deyilik. “Şüvəlan” da rəqibdir, onlara hörmətlə yanaşırıq.

- Ötən il “Neftçi”yə gedəndə komanda çətin vəziyyətdə idi. Bu mövsüm “Keşlə”də də belə haldı. Bu durum sizi motivasiya edir?

- Baş məşqçi o vaxt motivasiyalı olar ki, komandası liderlər qrupunda qərarlaşsın. Çalışırıq ki, komandanı bu vəziyyətdən çıxaraq. Hər bir işdə motivasiya olmalıdır. Bu olmasa, işlər yolunda getməz, nəticə olmaz. Özüm şən və yaxşı əhval-ruhiyyədə oluram ki, komandaya da pozitivlik keçsin. Özümü necə motivasiya edirəmsə, komandaya ikiqat təsir edirəm. Çünki biz bu yerə layiq deyilik.

- Ötən il acınacaqlı günlər yaşayan “Neftçi”ni avrokuboklara daşıyaraq, nəticə qazandınız. Bunu “Keşlə”də etmək mümkün olacaq?

- Biz istəkli olaraq, işləməyə davam etməliyik. Mənim sehrli çubuğum yox idi ki, gedib, “Neftçi”ni avrokuboklara daşıyım və son yerdən 3-cü pilləyə qədər aparım. Bu, tək Tərlan Əhmədovun əməyi deyildi. Düzdür, bütün məsuliyyət mənim üzərimdə idi. Hər il eyni uğuru qazanmaq çətindir. İstəyirəm ki, işlədiyim yerdə uğur olsun. Komandaya və ətrafımdakılara inamım olmasaydı, işə qol qoymazdım. Çətin və ağır mərhələli yoldur. Çalışacağıq ki, öhdəsindən gələ bilək.

- Yeddi yerli mütəxəssisin olduğu yarışda çempionata əcnəbi mütəxəssisin çalışdırdığı komanda başçılıq edir...

- Bu, futboldur. Hər şey mümkündür. Hər il yerli mütəxəssis çempion olurdu. Bizim işimiz irəli getməkdir. Hələ çempionluq barədə düşünmək tezdir. Əcnəbi məşqçi liderdirsə, hələ çempionluğa çox var. “Neftçi” ardıcıl 4 il çempion oldu və daha sonra “Qarabağ”ın dövrü başladı. Burada azərbaycanlı məşqçilərin rolu, əməyi olub. “Neftçi” bu gün liderlik edir, amma hər şeyə sonda baxarıq. Hələ çempionluğa çox var. //Sportal.az

Bütün xəbərlər Facebook səhifəmizdə

loading...