"Meydanda mümkün olan hər şeyi etməyə çalışacağıq"

“Yenidən bu möhtəşəm şəhərdə olduğum üçün məmnunam”. Bunu “Olimpiya”nın baş məşqçisi İliya Stolitsa deyib. Sloveniya klubu Çempionlar Liqasının I təsnifat mərhələsinin cavab matçı çərçivəsində sabah “Qarabağ”ın qonağı olacaq.

Oyundan əvvəl keçirilən mətbuat konfransında Stolitsa növbəti mərhələ üçün ümidli danışıb: “Bir neçə il əvvəl də Bakıda olmuşam. Şərait yüksək səviyyədədi. Hava şəraiti da ürəyimcədi”.

- İlk oyunda cansıxıcı futbol izlədik. Sabah yenə eyni oyun sərgiləyəcəksiniz?

- Mövsümün ilk matçı xarakterik olur. Hər iki komandanın ehtiyatlı oynaması normaldı. Ancaq hesab edirəm ki, nəticə oyuna görə olmadı. Belə matçlarda hansısa səhv həlledici ola bilər. Komandaların gücü bir-birinə yaxın olduğundan, istənilən nəticə ilə qarşılaşa bilərik.

- Kapitan Branko İliç ilk görüşü buraxmışdı. Abbas İssah isə qırmızı vərəqə aldığı üçün bu dəfə oynamayacaq. Bunlar sizin oyununuza necə təsir edə bilər?

- Hər iki oyunçu bizim üçün önəmlidi. Amma meydana 11 nəfərlə çıxacağıq. Kapitanımızın daha əvvəldən zədəsi var idi. Sabah oynayıb-oynamayacağı özünü necə hiss etməsindən asılı olacaq.

- İlk matçdan sonra hücumçunuzun aldığı qırmızı vərəqə ilə bağlı şərh verməmişdiniz. Yəqin ki, həmin epizodun təkrarına baxmısınız. Hücumçunuz Abbas İssah orda nə etmək istəyirdi?

- Mənim fikrim qərarı dəyişməyəcək. Buna görə də əlavə nəsə demək istəmirəm. Evdəki oyunu unudub, bütün diqqətimizi sabahkı qarşılaşmaya yönəldəcəyik.

- “Qarabağ”a hansı sürprizi hazırlamısınız?

- Bütün yoldaşlıq oyunlarına baxmışdıq. Onlar da bizim matçları izləyib. Sürpriz hazırladığımızı düşünmürəm. Hər zaman öz oyun üslubumu beynimdə inkişaf etdirmişəm. Sabah taktiki gedişlərlə yanaşı meydanda mümkün olan hər şeyi etməyə çalışacağıq.

Bütün xəbərlər Facebook səhifəmizdə

loading...

Digər layihələrimiz


Tərəfdaşlarımız