“Neftçi”nin futbolçusu Emin Mahmudov "Qarabağ"la oyundan (0:0) sonra jurnalistlərin suallarını cavablandırıb. Yarımmüdafiəçi maraqlı fikirlər səsləndirib.
- Oyun haqda nə deyə bilərsiz?
- Nəticə ədalətli oldu. Oyun ərzində qol vura, qol buraxa da bilərdik. Sonda yaxşı imkanımız olsa da, dəyərləndirə bilmədik.
- "Neftçi" bu gün 1 xal qazandı, ya 2 xal itirdi?
- Əgər 1 xal əldə etmişiksə, deməli, qazanmışıq (gülür).
- Turnir cədvəlində vəziyyət elədi ki, “Neftçi” “Qarabağ”la qarşılaşsa belə, qələbə qazanmalı idi...
- Düzdü, bizə hər oyunda qələbə lazımdı. Çünki irəlidəki komandalarla aradakı xal fərqini aradan qaldırmalıyıq. Qalib gələ bilməməyimiz pis oldu. Amma irəliyə doğru hərəkət etmək lazımdı. Qarşıda hələ 8 oyun var. Bu matçlardan maksimum faydalanmalıyıq. Bizdən öndə gedən komandalarla aradakı xal fərqinin artmasına imkan vermək olmaz.
- Baş məşqçi Tərlan Əhmədov mətbuat konfransında sizin zədəli olmağınıza rəğmən, oynadığınızı bildirdi. Bu amil millinin toplanışı ərəfəsində sizə mane ola bilərmi?
- Xeyr, mənim üçün problem deyil. Ayağımın arxa hissəsində yüngül ağrılar var. Ancaq bu, oyunuma təsir etmir. Bununla bağlı individual məşqlər edirəm. Sadəcə, son dəqiqələrdə yorğun olanda özünü müəyyən mənada göstərir.
- Bu gün 4-cü sarı vərəqəni alaraq, cəzalı duruma düşdünüz. Bu isə o deməkdi ki, Tərlan Əhmədov növbəti turda sizi oynada bilməyəcək...
- Bəli, çox pis oldu. Amma nə etmək olar? "Qarabağ"ın əks-hücuma keçməsinə mane olmaq lazım idi. Həmin epizodda özümün yox, komandanın maraqlarını düşündüm. Oynamasam belə, bizim yaxşı komandamız var. Məncə, olmamağım təsir göstərməyəcək.
- Azərbaycanda özünüzü necə hiss edirsiz? Rusiyaya qayıtmaq haqda düşünmürsüz?
- Xeyr, fikirləşmirəm. Sadəcə, istəyirəm ki, burda mənim üçün hər şey yaxşı olsun. Ondan başqa heç nə düşünmürəm.
Bütün xəbərlər Facebook səhifəmizdə
USD
EUR
GBP
RUB