“Xocalıya ədalət!” kampaniyası çərçivəsində Xocalı Soyqırımının 27-ci ildönümü ilə əlaqədar Azərbaycanın Belçikadakı səfirliyi və Belçika Brüssel Paytaxt Regionunun Hərbi komandanlığı ilə birgə Brüssel şəhərində yerləşən “Konqres sütunu” (Colonne du Congrès) memorial kompleksinin yanında dəfn olunmuş Naməlum əsgərin məzarı önündə anım mərasimi təşkil olunub. SİA xəbər verir ki, mərasimdə Azərbaycanın Belçikadakı səfirliyi və NATO yanında nümayəndəliyinin əməkdaşları və Belçikada yaşayan Azərbaycan diasporunun nümayəndələri iştirak ediblər.
Mərasim zamanı çıxış edən səfir Fuad İsgəndərov Ermənistan-Azərbaycan, Dağlıq Qarabağ münaqişəsi, bu münaqişənin ən unudulmaz və ən ağrılı hadisələrindən biri olan Xocalı qətliamı haqqında söz açıb və həmin hadisəni müharibə zamanı dinc əhaliyə qarşı törədilmiş ən vəhşi akt kimi dəyərləndirib. O, Avropanın paytaxtı hesab edilən Brüsseldəki bu tədbirin Azərbaycan və Avropanın ümumi tarixi nöqteyi-nəzərindən rəmzi əhəmiyyət kəsb etdiyini bildirib, II Dünya Müharibəsi zamanı 350 mindən artıq azərbaycanlının Avropanın dinc gələcəyi naminə öz həyatlarını qurban verdiklərini xatırladıb, bugünkü mərasimlə Azərbaycan xalqının məruz qaldığı Xocalı Soyqırımının Avropanın öz uzun tarixi boyu üzləşdiyi insan faciələri sırasında qeyd edildiyini vurğulayıb.
Sonra Belçika hərbçilərinin müşayiəti ilə Naməlum əsgərin məzarı önünə əklil qoyulub və əbədi məşəl alovlandırılıb, Azərbaycan Respublikası və Belçika Krallığının dövlət himnləri səsləndirilib. Sonda səfir F.İsgəndərov tərəfindən memorial kompleksinin xatirə kitabında Xocalı Soyqırımı barədə qeyd yazılıb.
Mərasimdən sonra isə “Xocalıya ədalət!” kampaniyası çərçivəsində Brüsselin Kral İncəsənət Muzeyində Azərbaycanın Belçikadakı səfirliyinin dəstəyi və Belçika Azərbaycanlılarının Mədəniyyət Mərkəzinin təşkilatçılığı ilə gənc rəssam Ramal Kazımın faciəyə həsr olunmuş rəsmlərindən ibarət “Xocalıya ədalət” adlı sərgisi keçirilib. Sərginin açılışında edilən çıxışlarda, faciənin ağır nəticələrinin incəsənət dili ilə tanıdılmasının önəmindən bəhs olunub, nümayiş etdirilən rəsm əsərlərinin Pablo Pikassonun “Gernika” əsərinin nümunəsində yaşanan insan faciəsinin bədii və emosional şəkildə təqdim edilməsi üçün ən səmərəli vasitələrdən biri olduğu önə çəkilib.
Bütün xəbərlər Facebook səhifəmizdə
USD
EUR
GBP
RUB