Naxçıvanda taktiki-xüsusi təlim keçirilib

... “Qar uçqunlarının nəticələrinin aradan qaldırılması” mövzusunda

Naxçıvan Muxtar Respublikası Fövqəladə Hallar Nazirliyinin tabeli qurumları fövqəladə hallar və digər xoşagəlməz hadisələr zamanı insanların təhlükəsizliyinin təmin edilməsi, fövqəladə hallara çevik reaksiyanın verilməsi, təbii və texnogen mənşəli fövqəladə hallardan (hadisələrdən) zərərçəkənlərin xilas edilməsi üçün müxtəlif taktiki-xüsusi təlimlər və əməli məşğələlər keçirir. Növbəti təlim Şahbuz Dövlət Təbiət Qoruğu ərazisində olub.

Naxçıvan Muxtar Respublikası Fövqəladə Hallar Nazirliyindən bildirilib ki, təlimə nazirliyin Mülki Müdafiə Alayının və Xüsusi Riskli Xilasetmə Xidmətinin 14 nəfərdən ibarət heyəti - xilasedici və kinoloqlar cəlb edilib. Əsas məqsəd Avstriyadan gəlmiş mütəxəssislərin iştirakı ilə Qusar rayonunun Şahdağ və Qəbələ rayonunun Tufandağ istirahət mərkəzlərində təlim keçmiş xilasedicilərin qazandığı bilik və bacarıqlarının öyrənilməsidir. Eyni zamanda, dağ şəraitində qar sürüşməsi zamanı kinoloqların xüsusi təyinatlı itlər, eləcə də qar uçqunları zamanı istifadə olunan xüsusi təyinatlı “Biper” aparatı və şuplar vasitəsilə xilasedicilərin axtarış-xilasetmə və digər təxirəsalınmaz işlərin aparılmasıdır.

Təlimin gedişində şərti olaraq dağlarda qar uçqununun yaranması ilə qar altında qalmış insanların axtarışının həyata keçirilməsi üçün bölmələr hadisə rayonuna yürüş keçirərək onlara hərəkət marşrutlarının qardan təmizlənməsi və hərəkətin bərpa olunması məşq etdirilib. Hadisə yerinə çatan xilasedicilər və kinoloqlar ərazinin vizual kəşfiyyatını aparıb, daha sonra təhlükəsizlik qaydalarına əməl etməklə qar uçqunu altında qalmış insanların axtarışını həyata keçirib, onların yerlərini müəyyənləşdiriblər.

Növbəti mərhələdə zərərçəkənlərin xilas edilməsi işləri alpinist avadanlıqlarının və digər alətlərin köməyi ilə aparılıb, donvurmadan zərərçəkənlərə ilk yardım göstərilib, onların yaxınlıqdakı xəstəxanaya təxliyəsi həyata keçirilib.

Təlim uğurla başa çatdırılıb, qarşıya qoyulmuş məqsədlərə, əsasən, nail olunub.

Bütün xəbərlər Facebook səhifəmizdə

loading...