Trustkavets Azərbaycanın turizm bölgələri ilə əməkdaşlığa xüsusi maraq göstərir

Ukraynanın mərkəzi kurort şəhəri olan Trustkavets Azərbaycanın zəngin turizm bölgələri ilə əməkdaşlığa xüsusi maraq göstərir. SİA xəbər verir ki, bu fikri adıçəkilən şəhərdə səfərdə olan Azərbaycanın Ukraynadakı səfiri Azər Xudiyevlə görüşündə Truskavets şəhər meri Andrey Kulçinski deyib.

Azərbaycanla Ukrayna arasında bir çox istiqamətlərlə yanaşı iqtisadi, mədəni, idman və turizm sahələrində əməkdaşlığın əsas prioritetlərindən olduğunu deyən şəhər meri Truskavetsdə ilk dəfə olaraq dünya şöhrətli müğənni və bəstəkar, SSRİ və Azərbaycanın Xalq artisti Müslüm Maqomayevin xatirəsinə həsr olunmuş vokal beynəlxalq müsabiqəsinin keçirildiyini bildirib. Bu müsabiqənin nəinki iki dost ölkə arasında, o cümlədən Ukraynada yaşayan müxtəlif xalqların həmrəylik təntənəsinə çevrildiyini vurğulayıb.

Ölkəmizdə turizm sektorunun inkişafından söz açan mer qeyd edib ki, Azərbaycanın kurort bölgələri ilə Truskavets arasında qarşılıqlı turizm mübadiləsinin aparılması ikitərəfli münasibətlərimizin inkişafında yeni eranın başlanğıcı ola bilər.

Son bir ildə Azərbaycanla Ukrayna arasında mal dövriyyəsinin inkişaf tempindən söz açan səfir Azər Xudiyev azərbaycanlı iş adamlarının Ukraynanın bir çox iqtisadi layihələri ilə yanaşı turizm sektoruna da böyük investisiya yatırımları qoyduğunu diqqətə çatdırıb. Görüş zamanı hər iki ölkə arasında səmərəli investisiya mühitindən yararlanmağın vacibliyini vurğulayan səfir bildirib ki, Azərbaycanda xarici investorların yatırımı üçün kifayət qədər sağlam mühit mövcuddur.

A.Xudiyev bildirib ki, Azərbaycanın tanınmış şirkətləri Trustkavets şəhərinin iri layihələrinə investisiya qoymağa hazırdır. Azərbaycanın bölgə şəhərləri ilə Ukraynanın Trustkavets şəhəri arasında iqtisadi, sosial layihələrin reallaşdırılması üçün birgə işlər həyata keçirilməlidir. Azərbaycanın qapıları Ukrayna sərmayəçilərinin üzünə açıqdır.

Bütün xəbərlər Facebook səhifəmizdə