"Azərbaycan dövləti veteranlara yüksək diqqət və qayğı göstərir"

Bakıya səfər etməkdən və burada beynəlxalq konfransda iştirak etməkdən qürur hissi keçirirəm. 1987-ci ildə ölkənizdə veteranlar təşkilatının yaradılması çox önəmli hadisədir. Mən 30 illik yubiley münasibətilə Azərbaycan Respublikası Müharibə, Əmək və Silahlı Qüvvələr Veteranları Təşkilatının rəhbərliyini və üzvlərini təbrik edirəm.

Bu fikirləri “Müasir dünyada təhlükəsizlik: qlobal və regional çağırışlar” mövzusunda beynəlxalq konfransda iştirak edən Dünya Veteranlar Federasiyasının sədri Dan-Viqqo Berqtun AZƏRTAC-a müsahibəsində söyləyib.

Paytaxtımızda keçirilən konfransın terrorçuluğa qarşı mübarizəyə, beynəlxalq sülhün təminatına töhfə verəcəyinə inandığını bildirən Dan-Viqqo Berqtun deyib ki, İkinci Dünya müharibəsində alman faşizmi üzərində Qələbədə və hazırda sülhün qorunmasında xalqlar birliyi tarixi rol oynayıb. Azərbaycan xalqı da İkinci Dünya müharibəsində Qələbənin qazanılmasına böyük töhfələr verib. Biz beynəlxalq veteranlar təşkilatları olaraq, bu tarixi birlikdə qeyd edirik. Belə tədbirlərin yalnız regional miqyasda deyil, bütün Avropa ölkələrinin veteranlarının iştirakı ilə daha yüksək səviyyədə keçirilməsini arzulayırıq.

Veteranlar yaşayan tarixdirlər. Odur ki, biz veteranları qorumalı və onlara qayğı göstərməliyik. Veteranlar İkinci Dünya müharibəsində misilsiz rəşadətlər göstəriblər. Bu tarixi keçmişimizi gənclərimizə çatdırmalıyıq. Azərbaycanda veteranlara dövlətiniz tərəfindən yüksək diqqət və qayğı göstərilir. Bu diqqət ildən-ilə daha da artır.

Bütün xəbərlər Facebook səhifəmizdə