“Tarixini unutma!” layihəsi çərçivəsində Qubada tədbir keçirilib

“Turan Araşdırma Mərkəzi” İctimai Birliyinin “Tarixini unutma!” layihəsi çərçivəsində Qubada tədbir keçirilib. SİA-nın verdiyi məlumata görə, tədbir ilk olaraq 100 il bundan əvvəl erməni quldurları tərəfindən kütləvi şəkildə qətlə yetirilmiş azərbaycanlıların basdırıldığı məkandan - Quba Soyqırım Memorial Kompleksindən başlanılıb.

Tədbirdə çıxış edən TAM-ın sədr müavini, iqtisadçı alim, hüquqşünas Cavid İsmayıl Prezident İlham Əliyevin Cümhuriyyətin 100 illiyi ilə bağlı imzaladığı sərəncamdan söz açıb, bununla bağlı İctimai Birliyin reallaşdırdığı layihələrdən danışıb. Bildirilib ki, “Tarixini unutma!” layihəsi də onlardan biridir.

Cavid İsmayıl 200 ildən artıq bir dövrdə ermənilər vasitəsilə Azərbaycan xalqına qarşı zaman–zaman həyata keçirilən soyqırımı hadisələrindən, erməni terrorunun tarixindən və bugünkü erməni işğalından ətraflı bəhs edib.

Ümummilli Lider Heydər Əliyevin "Tarixi yaddaşsızlıq və unutqanlıq xalqımıza baha başa gələ bilər. Azərbaycanlılara qarşı zaman-zaman törədilən bu ağır cinayətləri unutmamaq, böyüyən nəsli bədxah qüvvələrə və onların məkrli niyyətlərinə qarşı ayıq-sayıqlıq ruhunda tərbiyə etmək mühüm vəzifədir” sözlərini xatırladan TAM-ın sədr müavini hər bir azərbaycanlının öz tarixini dərindən bilməli olduğunu deyib.

Sosioloq, professor Əhməd Qəşəmoğlu təcavuzkar ermənilərin daim fürsət tapdıqca, Azərbaycana qarşı torpaq iddialarından, zaman-zaman azərbaycanlılara qarşı soyqırım hallarından geniş danışıb. Azərbaycanlıları tarixi torpaqlarından sıxışdırıb çıxarmaqları, əzəli azərbaycan torpaqlarında mifik “böyük Ermənistan” yaratmaq məqsədi ilə Azərbaycan və türk xalqlarının bir əsrdən cox olan bir müddətdə müntəzəm surətdə ermənilərin ideoloji, hərbi və mədəni təcavüzünə məruz qalması barədə geniş məlumat verib.

Azərbaycan Yazıçılar Birliyinin üzvü, tanınmış jurnalist Kamil Nehrəmli, Ermənilərin 1918-ci ildə təkçə Qubada törətdikləri soyqırım zamanı 16 mindən çox dinc əhalinin qətlə yetirdiyini, 122 kənd, 26 məscid, yüzlərlə ev və digər tikililər yandırılaraq məhv etdiklərini birdaha vurğulayaraq tarixən Azərbaycanın digər bölgələrində törətdikləri soyqırımları nəzərə çatdırıb. O, qeyd edib ki, gənclərimiz bu soyqırım hallarını daima xatırlamalı və unutdurmamalıdırlar. Natiq qeyd edib ki, kütləvi qırğınlar və repressiyalarla bağlı faktları dünya tarixində XX yüzilliyin ən faciəvi səhifələrindən biri saymaq olar. Azərbaycan xalqının bu faciəvi tarixində "Böyük Ermənistan" xülyası ilə yaşayan erməni şovinizminin məkirli xislətinin durduğunu qeyd edib.

Quba rayonu icra hakimiyyətinin nümayəndəsi Aynur Yəhyayeva “Turan Araşdırma Mərkəzi” İB-nin nümayəndələrini salamlayıb və rayonda belə tədbirlərin keçirilməsi daim diqqətdə olduğu, Quba gənclərinin vətənpərvərlik ruhunun yüksək olması barədə geniş söz açıb. Eyni zamanda Aynur Yəhyayeva da tarixin ağrılı-acılı dövründən, Qubada yaşayan azsaylı xalqlarında bu soyqırıma məruz qalmaları haqda toplantı iştirakçılarına məlumat verib.

Sonra tədbirin ikinci hissəsi Quba rayon Tarix diyarşunaslıq muzeyində davam etdirilib.

İştirakçılara “Turan Araşdırma Mərkəzi” İB-i Azərbaycan Respublikasının Prezidenti yanında Qeyri Hökumət Təşkilatlarına Dövlət Dəstəyi Şurasının maliyyə dəstəyi ilə xüsusi hazırlanan xüsusi film nümayiş etdirilib.

Filmdə elmi araşdırmalar beynəlxalq terrorizmin tərkib hissəsi olan erməni terrorunun tarixinin 100 ildən çox olduğunu, Ermənistan dövlətinin və erməni diasporunun maliyyə və təşkilatı yardımı ilə dünyanın müxtəlif ölkələrində fəaliyyət göstərən erməni terrorçu təşkilatlarının Azərbaycana qarşı apardığı terror müharibəsi barədə geniş məlumat verilir.

Tədbir iştirakçılarına xüsusi hazırlanmış bukletlər və təqdim edilmiş film elektron daşıyıcılarda paylanılıb.

Bütün xəbərlər Facebook səhifəmizdə