Bakı Ali Neft Məktəbinin (BANM) “İnformasiya təhlükəsizliyi mühəndisliyi” ixtisasına qəbul olan, 700 bal toplamış Əsra Bayramova BANM-ın İctimaiyyətlə əlaqələr şöbəsinə müsahibə verib.

SİA müsahibəni təqdim edir:

- Əsra, özünüz haqda bir az danışın.

- Mən 2001-ci ilin avqust ayında, Sumqayıt şəhərində anadan olmuşam və ailənin ilk övladıyam. Təbiət Elmləri Təmayüllü Gimnaziyanı bitirmişəm. Bütün fənlərə eyni dərəcədə maraq göstərmişəm, lakin sonradan dəqiq elmlərə daha çox üstünlük verməyə başladım. Riyaziyyat üzrə keçirilən olimpiadalarda daim iştirak edib müxtəlif nəticələr göstərmişəm.

Bundan başqa, Sumqayıtda Bülbül adına 5 saylı Musiqi məktəbində fortepiano üzrə təhsil almışam, eyni zamanda şahmatla məşğul olmuşam.

- Qəbul imtahanında göstərdiyin uğura görə kimə təşəkkür edərdin?

- Uğurumu valideynlərimə və müəllimlərimə borcluyam. Biliklərə yiyələnməyimdə və formalaşmağımda daim onların dəstəyini hiss etmişəm.

- Əsra, ali məktəblər arasında niyə məhz BANM-ı seçdiz?

- Texniki elmlərə böyük marağım var. BANM isə bu elmləri ingilis dilində, eyni zamanda dünya standartlarına uyğun tədris edən yeganə ali məktəbdir. Həmçinin burada yalnız bilik səviyyəsi yüksək olan, imtahanlarda yüksək bal toplayan tələbələr cəmlənib. Tələbələr üçün yaradılan şəraitlə də tanış olduqdan sonra seçimimin BANM olduğunu təsdiq etdim.

- Boş vaxtlarınız olduğu zaman nə etməyi sevirsiz?

- Sakit bir yerdə xarici ədəbiyyat oxumağı çox sevirəm. Bəzən fortepianoda da ifa edirəm.

- BANM-ı bitirdikdən sonra planlarınız nədir?

- BANM-ı bitirdikdən sonra ixtisasım üzrə bilikli mütəxəssis olacağıma əminəm. Öz sahəm üzə biliklərimi uğurla tətbiq edərək həyatda öz yerini tapmış və təsdiqləmiş bir mühəndis olmaq istərdim.

- Sizcə bir insanın uğur əldə etməsi üçün ona nə lazımdır?

- Düşünürəm ki uğur əldə etmək üçün insana 3 şey lazımdır: hədəf, çalışqanlıq və özünə inam.

- BANM-da hansı ixtisası seçdiz və həmin ixtisas nə ilə sizi özünə cəlb etdi?

- BANM-da seçdiyim ixtisas “İnformasiya təhlükəsizliyi mühəndisliyi” oldu. Son dövrün ən aktual sahəsi olduğunu və gələcək prespektivini nəzərə alaraq bu sahəni seçməyə qərar verdim.

- Əsra, sizdən sonra gələcək abituriyentlərə nə məsləhət edərdiz?

- Abituriyentlərə demək istərdim ki, sistemli olaraq daim və davamlı olaraq çalışsınlar, yuxu rejimini isə pozmasınlar. Ən əsası isə özlərinə inansınlar.

Bütün xəbərlər Facebook səhifəmizdə

loading...