ADU-nun Konfutsi İnstitutunun təşkilatçılığı ilə Bakı Peşə Liseyində Kulinariya Festivalı keçirilib FOTO

Azərbaycan Dillər Universitetinin (ADU) nəzdində fəaliyyət göstərən Konfutsi İnstitutu, Azərbaycan Milli Kulinariya Mərkəzi və “Böyük Çin səddi” Çin Yeməkxana Mərkəzinin birgə təşkilatçılığı ilə 12 nömrəli Bakı Peşə Liseyində XII Çin Kulinariya Festivalı keçirilib.

ADU-dan SİA-ya verilən məlumata görə, açılış nitqi ilə çıxış edən Azərbaycan Milli Kulinariya Mərkəzinin direktoru Tahir Əmiraslanov gənc azərbaycanlı könüllü mütəxəssislərin peşə bacarıqlarının artırılmasının və ölkəmizdə turizmin inkişafı baxımından xarici ölkələrin kulinariya ənənələri ilə tanışlığın vacibliyindən danışıb.

Festivalda iştirak edən Konfutsi İnstitutunun direktoru Li Jihua və Rafiq Abbasov Çin mətbəxini Çin mədəniyyətinin vacib bir hissəsi kimi xarakterizə ediblər. Onlar Çin mətbəxinin uzun tarixi, unikal xüsusiyyətləri, çoxsaylı üslub və ənənələri, istisna yemək üsulları olduğunu bildiriblər.

Daha sonra Çin kulinariyası haqqında film nümayiş olunub, eyni zamanda Konfutsi İnstitutunun tələbələri və müəllimləri ənənəvi Çin mahnıları və rəqsləri, bambuklu fleyta ifasında qədim Çin musiqilərindən ibarət konsert proqramı ilə çıxış ediblər.

Tədbir çərçivəsində Pekindən gələn tanınmış aşpazlar Li Changrong və Zhang Ming məşhur Çin mətbəxi yeməklərinin hazırlanması üzrə ustad dərsi keçiriblər. Çinli aşpazlar liseyin tələbə və müəllimləri ilə birlikdə ət, tərəvəz və balıqdan hazırlanan Çin yeməklərinin sirrlərini paylaşıblar.

Tədbirin sonunda Azərbaycan Milli Kulinariya Mərkəzi tərəfindən ADU-nun Konfutsi İnstitutuna və Çindən gələn aşpazlara fəxri diplomlar təqdim olunub.

Bütün xəbərlər Facebook səhifəmizdə