Türkdilli diasporların atlası hazırlanacaq

Bu gün İstanbulda Türkdilli Dövlətlərin Əməkdaşlıq Şurasının (TDƏŞ) nəzdində fəaliyyət göstərən diasporla iş üzrə Təmas qrupunun IV iclası keçirilib.

Diasporla İş üzrə Dövlət Komitəsinin mətbuat xidmətindən Trend-ə verilən məlumata görə, TDƏŞ Baş katibinin müavini Ömer Kocamanın sədrliyi ilə keçirilən toplantıda Türkiyə Respublikasının Nazirlər Kabineti yanında Xaricdə Yaşayan Türklər və Əqraba Toplulukları Departamentinin rəhbəri Mehmet Köse, Azərbaycan Respublikası Diasporla İş üzrə Dövlət Komitəsi Aparatının rəhbəri Nəriman Qurbanov, Qazaxıstan Mədəniyət və İdman Nazirliyinin Komitə rəhbərinin müavini Galymzhan Meldeshev və Qırğızıstanın İstanbuldakı Baş Konsulluğunun konsulu Tilek Kozhogulovun rəhbərliyilə üzv ölkələrin diasporla iş üzrə Təmas qrupunun üzvləri iştirak edib.

Toplantıda, "Türk Şurası 2018-2019-cu illər üçün birgə fəaliyyət Planı", "Türk Şurası Türkdilli Diasporun birgə Fəaliyyət Strategiyası", Türkiyədə keçiriləcək TDƏŞ-ə üzv ölkələrin diaspor təşkilatları rəhbərlərinin II Forumunun və üzv dövlətlərin diasporla iş üzrə nazirlik və qurum rəhbərlərinin II görüşünün keçirilməsinə hazırlıq və digər məsələlər ətrafında müzakirələr aparılıb. Dünyada və regionda cərayan edən hadisələr fonunda Türkiyə və Azərbaycan tərəfinin "Türk Şurası Türkdilli Diasporun birgə Fəaliyyət Strategiyası" layihəsi ilə bağlı rəy və təkliflər müzakirə edilərək qəbul olunub. Türk Şurasına üzv dövlətlərin diasporla iş üzrə nazirlik və qurum rəhbərlərinin II görüşünün Türkiyənin evsahibliyi ilə bu ilin aprel-may ayları ərzində keçirilməsi qərara alınıb. "Türk Şurası Türkdilli Diasporun birgə Fəaliyyət Strategiyası" layihəsi Türk Şurasına üzv dövlətlərin diasporla iş üzrə nazirlik və qurum rəhbərlərinin II görüşündə imzalanaraq qüvvəyə minəcək.

Bununla yanaşı, tərəflər Türkdilli diasporlar arasındakı əməkdaşlıq çərçivəsində 2018-2019-cu illər üçün həyata keçiriləcək tədbirlərin Fəaliyyət Planının yekdil fikir bildiriblər. Tərəflər üzv dövlətlərə qarşı qarayaxma, mənfi meyillərə qarşı xalqların arasındakı birliyi, xaricdə yaşayan vətəndaşlarımızın arasındakı əlaqələri gücləndirmək və ortaq dəyərlərimizlə bağlı maarifləndirmə aparılması məqsədi ilə TDƏŞ-ə üzv ölkələrin diaspor təşkilatları rəhbərlərinin II Forumunun 2018-ci ilin sonu 2019-cu ilin əvvəlində Türkiyədə keçirilməsi ilə bağlı razılıq əldə olunub.

Toplantı çərçivəsində Türkdilli diasporlar arasında əməkdaşlıq və koordinasiyanın inkişaf etdirilməsi məqsədilə Azərbaycan tərəfinin təcrübəsindən istifadə edərək üzv dövlətlərin türkdilli diasporların məskunlaşma coğrafiyasına uyğun olaraq "Diaspor Atlasının" hazırlanması qərara alınıb.

Bütün xəbərlər Facebook səhifəmizdə

loading...