“İlham Əliyevin Borçalıya böyük sevgisi kimsəyə sirr deyil” MÜSAHİBƏ

“Borçalı” İctimai Birliyinin sədri Pünhan Məmmədov: ““Borçalı” İctimai Birliyi Gürcüstan və Azərbaycan arasında dostluq körpüsünə çevriləcək”

Ötən ay - 9 dekabr 2017-ci ildə “Borçalı” İctimai Birliyi (İB) özünün növbəti ümumi yığıncağını keçirib. Toplantıda Birliyin yeni sədri və rəhbərliyi seçilib. Qurumun yeni sədri Pünhan Məmmədovla görüşümüzdə “Borçalı” İB-nin fəaliyyət istqaməti ilə bağlı maraqlı söhbət etdik.

- Pünhan müəllim, ilk olaraq Sizi “Borçalı” İctimai Birliyinin sədri seçilməniz münasibətilə təbrik edirik...

- Çox sağ olun.

- Səhv etmiriksə, artıq sədr seçilməyinizin bir ayı tamam oldu. Bu bir ayı necə başa vurdunuz?

- Etiraf edim ki, ilk bir ay müddətində ciddi fəaliyyət ortaya qoya bilmədik. Çünki hazırda yenidən formalaşma dönəmini yaşayırıq. Bundan əlavə, indiyədək Birliyin ofisi olmadığından, bu bir ayı əsasən bu problemin həllinə yönəltdik. Paralel olaraq strukturun yenidən formalaşdırılması və təşkilatlanma işləri ilə bağlı müəyyən məsələləri həll etməkdəyik. Güman edirəm ki, yaxın vaxtlarda bu işləri həll etdikdən sonra, artıq qarşıya qoyulan və Birliyin Nizamnaməsində əks olunan məsələlərin, yəni ümumi hədəflərimizin həyata keçirilməsi istiqamətində ardıcıl və prinsipial fəaliyyətə başalayacağıq.

- “Borçalı” İctimai Birliyinin ümumi hədəfləri nələrdən ibarətdir?

- Ümumi hədəflər, qeyd etdiyim kimi, Birliyin Nizamnaməsində nəzərdə tutulan məsələlərdən ibarətdir. Biz qanunların bizə tanıdığı sərhədlər çərçivəsində fəaliyyət göstərəcəyik. Ümumiyyətlə, “Borçalı” İctimai Birliyinin əsas missiyası toplumda barışdırıcı mövqeyə nail olmaqdır. Biz düşünürük ki, pərakəndə halda heç bir problemin həllinə nail ola bilmərik. Borçalıda yaşayan soydaşlarımızın, eləcə də Azərbaycandakı Borçalı əsilli vətəndaşlarımızın əsas yükünü “Borçalı” İctimia Birliyi öz üzərinə götürməyi qarşıya məqsəd qoyubsa, buna ancaq birlik halında nail olmaq mümkündür...

- Kimə qarşı birlikdən söhbət gedir?

- Problemlərimizə qarşı. Biz hansısa siyasi oyunlarda iştirak etmək fikrindən uzağıq. “Borçalı” İctimai Birliyini zaman-zaman siyasi proseslərin alətinə çevirmək istəyiblər. Təbii ki, belə olduqda da Birlik öz hədəflərindən yayınaraq, tamam fərqli istiqamətdə fəaliyyət göstərib. Bu gün “Borçalı” adına iddia edən bir sıra qrupların mövcudluğu da elə bununla bağlıdır. Yəni hələ də müyyən şəxslər Borçalı toplumunu əsas hədəfdən yayındıraraq, fərqli istiqamətlərə yönəltməyə çalışır. Amma biz bunun qarşısını alacağıq. Yaxın dönəmdə hər kəs “Borçalı” İctimai Birliyinin əsas fəaliyyət istiqamətinin nə olduğunu, Birliyin təxribatçı qruplar qarşısında necə böyük bir sipərə çevrildiyini görəcək.

- Borçalı toplumunu hədəfdən yayındırmaq istəyənlər kimlər, hansı qüvvələrdir?

- Azərbaycanın və Gürcüstanın inkişafını və dostluğunu istəməyən qüvvələr. Doğrudur, “Borçalı” İctimai Birliyi siyasi fəaliyyətdən uzaq bir təşkilatdır. Amma bu Birlik Azərbaycan və Gürcüstan arasında dostluq körpüsünə çevrilmək istəyirsə, bu zaman hər iki ölkənin dövlət bütövlüyünə, sabitliyinə zərbə vurmaq istəyən qüvvələrə qarşı çıxmaqdan da çəkinməyəcək. Biz hiss edirik ki, hazırda Borçalı uğrunda çox gərgin siyasi proseslər cərayan edir. Azərbaycana və Gürcüstana basqıların artdığını da görürük. Bütün bunlar bizi narahat edir. Biz,

xüsusən də Borçalı əsilli azərbaycanlıların və Borçalıda yaşayan soydaşlarımızın bu siyasi proseslərdə alətə çevrilməsindən narahatıq. Bəzi insanları müxtəlif yollarla və müxtəlif vədlərlə Borçalı dəyərlərinə qarşı qoymaq istəyirlər. Odur ki, biz həmin qüvvələri durdurmaq üçün var gücümüzlə mübarizə aparacaq və həqiqətləri çılpaqlığı ilə soydaşlarımıza çatdırmağa çalışacağıq.

- Nə baş verir? Bəlkə bu haqda bir qədər açıq danışasınız...

- Əslində baş verənlər heç də gizli deyil. Sadəcə, prosesləri ardıcıl şəkildə izləmək lazımdır. Bu zaman bəlli olacaq ki, 2018-ci ilin seçki gərginliyindən yararlanmaq istəyən müəyyən qüvvələr Azərbaycan və Gürcüstanda öz məkrli planlarını həyata keçirməyə çalışırlar. Yəqin ki, seçki dönəminə yaxınlaşdıqca, bu insanların niyyətləri daha açıq şəkildə orataya çıxacaq. Amma biz bu gün onların niyyətlərini görür və bu səbəbdən hər iki toplumu ayıq-sayıq olmağa çağırırıq. O yerdə ki, dövlət maraqlarına, dövlətimizin təhlükəsizliyinə xələl gətirmək istəyən qruplar meydandadır, onların qarşısında qaçmaq və meydanı onlara buraxmaq olmaz. Mən xüsusən də Gürcüstanda belə bir təhlükənin mövcudluğundan çox narahatam. Çünki bizə gələn informasiyalara görə, bəzi soydaşlarımız özləri də dərk etmədən müxtəlif təhlükəli oyunların içində yer alır. Biz, dünyanın harada yaşamasından asılı olmayaraq, heç bir azərbaycanlının ayağına daş dəyməsini belə istəmirik. Ən əsası da hansısa bir azərbaycanlıdan Gürcüstan, eləcə də Azərbaycan dövlətinə qarşı istifadə olunması bizi narahat etməyə bilməz. Hər kəsə bəllidir ki, Gürcüstanda yaşayan soydaşlarımız hər zaman separatçı meyllərdən uzaq olub. İndiyə kimi heç bir soydaşımız Gürcüstanın dövlət bütövlüyünə qarşı çıxmayıb. Ən azı, mən belə bir faktın şahidi olmamışam. İstəyirəm ki, bundan sonra da təmsil etdiyim tolumun bircə nəfəri belə, kənar təsirlər altında öz dövlətinə qarşı çıxmaq niyyətində olmasın.

- Yenə diplomatik cavab oldu. Azərbaycan və Gürcüstanın təhlükəsizliyinə xələl gətirmək istəyən qüvvələr içərisində ermənilər də yer alırmı?

- Ümumiyyətlə, bu məsələlərdə ermənilər çox xırda füqurlardır. Doğrudur, onlar zaman-zaman istər Azərbaycana, istər Gürcüstana qarşı düşmənçilik mövqeyi sərgiləməkdədir. O cümlədən ermənilərin hazırda Gürcüstanda separatçılıq fəaliyyəti ilə məşğul olduğu da sirr deyil. Bunu Gürcüstan dövlətinin rəhbərliyi də çox gözəl bilir. Amma ermənilərin bu məsələdə öz ağılları ilə hərəkət etmədiyi, arxalarında daha güclü qüvvələrin durduğu da siyasi dairələrə bəllidir. O cümlədən Gürcüstandakı seçki prosesində də onlardan istifadə olunacağı istisna deyil. Yəqin ki, bunu da Gürcüstanın aidiyyatı qurumları nəzarətdə saxlayacaq. Amma bizi daha çox narahat edən ermənilərin fəaliyyəti yox, bizim soydaşlarımızın yanlış yönə istiqamətləndirilməsidir. Bununla belə, güman edirəm ki, qarşıdakı aylar ərzində “Borçalı” İctimai Birliyi bu sahədə ciddi fəaliyyət göstərməklə, öz imkanları daxilində müəyyən təhlükələri önləyə biləcək.

O ki qaldı ermənilərin Azərbaycanın təhlükəsizliyinə qarşı fəaliyyət göstərmək imkanlarına, mən əminliklə qeyd edirəm ki, Azərbaycan dövlət başçısının apardığı uğurlu xarici siyasət nəinki ermənilərin, ölkəmizə qarşı düşmən mövqedə olan bütün xarici qüvvələrin qarşını alıb. Heç də təsadüfi deyil ki, Azərbaycan regionun, eləcə də dünyanın ən təhlükəsiz ölkələri siyahısında yer alır. Bu gün dünyada çox az ölkələr var ki, onun vətəndaşları özlərini vətənində təhlükəsiz hiss edir və heç bir qorxu xofu altında yaşamır. Nə yaxşı ki, bizim vətəndaşlar da həmin kateqoriyaya daxildir. Bilirsiniz ki, əslində bizim ölkəmiz coğrafi mövqeyi baxımından daha həssas bir bölgədə yerləşir. Qonşularımızın hamısı heç də Azərbaycanın inkişafını istəyən, bizi sevən dövlətlər deyil. Amma Azərbaycanın dövlət başçısının apardığı uğurlu xarici siyasət, dediyim kimi, bizim ölkəmizi bütün təhlükələrdən, kənar təsirlərdən sığortalayır. Üstəlik, belə bir mürəkkəb geo-siyasi vəziyyətdə Azərbaycan dünyanın ən təhlükəsiz ölkələrindən birinə çevrilməyi bacarıb. Bu da sözsüz ki, az zəhmət hesabına başa gəlməyib.

- Azərbaycan-Gürcüstan münasibətləri haqda nə deyə bilərsiniz? Xüsusən də Borçalı məsələsində hər iki ölkənin mövqeyi üst-üstə düşürmü?

- Azərbaycan və Gürcüstan strateji müttəfiqlər olmaqla yanaşı, yaxın dost ölkələrdir. Bu ölkələr bir-birinin ağrı-acısı ilə yaşamağa məhkumdur. Hər iki ölkəni onların taleyi bağlayır. Diqqət edək, hər iki ölkə istər 20-ci əsrin əvvəlində, istər də Sovetlər Birliyi dağılandan sonra demək olar ki, eyni vaxtda müstəqilliyə qoşuvublar. Hər iki ölkənin ərazisi eyni qüvvələr tərəfindən və təxminən eyni vaxtda zəbt olunub. Təbii ki, burda istər abxazlar, istər də ermənilər sadəcə fiqurlardır, bu işğalın arxasında dayanan güc hər kəsə bəllidir. Eləcə də bu gün hər iki ölkə eyni gücün təzyiqi altında yaşamaqdadır. Bütün bunlar və digər bir sıra məsələlər hər iki ölkəni istər-istəməz yaxınlaşmağa, yaxın müttəfiqlərə çevrilməyə sövq edir. O cümlədən Borçalı məsələsində də bu ölkələrin maraqları əksər hallarda üst-üstə düşür. Məsələn, Borçalıya qarşı hər hansı bir təhlükə yarandığı zaman bizi ilk düşündürən soydaşlarımızın taleyi olarsa, Gürcüstan dövlətini azərbaycanlılar da daxil olmaqla öz vətəndaşları, ərazi bütövlüyünün toxunulmazlığı narahat edəcək. Deməli, ən azı bu təhlükənin yaranma ehtimalı Gürcüstan və Azərbaycanın Borçalı məsələsində bir arada olmasını diqtə edir.

Digər tərəfdən, Azərbaycanın Borçalıya münasibəti də diqqətlərdən qaçmamalıdır. Bilrisiniz ki, hələ mərhum prezident Heydər Əliyevin hakimiyyəti dönəmindən Azərbaycan dövləti Borçalıya qarşı çox həssas münasibət sərgiləyib. Təsadüfi deyil ki, bir sıra regional və qlobal layihələrdə Azərbaycan hər zaman borçalıların maraqlarını nəzərə alıb. Eynilə cənab İlham Əliyevin də hazırda Borçalıya böyük sevgi ilə yanaşdığı kimsəyə sirr deyil. Hansı ki, bu sevgini çox sayda soydaşımız öz yaşam tərzində hiss etməkdədir. Doğrudur, bəzən soydaşlarımız

Azərbaycan dövlətindən daha çox güzəştlər istəyir. Məsələn, miqrasiya, təhsil, gömrük və s. məsələlərdə. İnanırıq ki, bu sahədə mövcud olan bəzi neqativlər də zaman-zaman həllini tapacaqdır. Əslində, “Borçalı” İctimai Birliyinin fəaliyyətinin bir istiqaməti də qeyd etdiyim və etmədiyim məsələlərlə bağlı müəyyən layihələr işləyib, Azərbaycan dövlətini onların həllinə inandırmaq və tədricən çatışmazlıqları aradan qaldırmaq olmalıdır. İnanıram ki, bütün bunların həllinə çox da uzaq olmayan zaman kəsimində nail olacağıq.

- Rəhbərlik etdiyiniz qurumun qarşıda nə kimi planları var?

- Qeyd etdiyim kimi əsas gücü təşkilatlanmaya vermişik. Bununla yanaşı, yaxında bir sıra tədbirlər keçirməyi də planlaşdırırıq. Məsələn, Azərbaycan və Gürcüstanın müstəqilliyinin 100 illiyi ilə bağlı konfrans keçirmək fikrimiz var. Bundan əlavə, hər zaman borçalılara qayğı ilə yanaşan Ümummilli Lider Heydər Əliyevin anadan olmasının bu il 95 ili tamam olur. Bununla bağlı Gürcüstanda və Azərbaycanda tədbir keçirməyi nəzərdə tutmuşuq. Yəni bu kimi bir sıra tədbirlərin keçirilməsi planımız var. Amma əsas diqqəti bu tədbirlərlə yanaşı, mövcud olan bir sıra problemlərin həllinə yönəldəcəyik. Bu problemlərin hər biri mütəxəssislər tərəfindən ayrıca araşdırılacaq və hər bir məsələ ilə bağlı dövlətə mükəmməl layihələr paketi təklif olunacaq. Bəzi məsələlər də var ki, onları öz imkanlarımız hesabına həll etməyə çalışacağıq. Çünki, artıq “Borçalı” İctimai Birliyinə böyük maraq olduğunu görürük. Bu gün Birliyin rəhbərliyində sağlam bir komanda təmsil olunur. Hansı ki, bu insanlar Borçalı marağını hər zaman şəxsi maraqlarından öndə tutmağı bacarıblar. Bu səbəbdən də Birliyə maraq günbəgün artmaqdadır. İnanıram ki, biz birgə çox işlər görə biləcəyik.