“Könüllülər Parlamenti Azərbaycan” 2017

Azərbaycan Respublikasının Prezidenti yanında Gənclər Fondunun maliyyə dəstəyi, “ASAN Könüllüləri” Təşkilatının təşkilatçılığı və Azərbaycan Respublikasının Vergilər Nazirliyinin Tədris Mərkəzinin tərəfdaşlığı ilə gənclərə siyasi analiz bacarıqlarını göstərməyə şans yaradacaq “Könüllülər Parlamenti Azərbaycan” layihəsinə növbəti dəfə start verilir! SİA-nın xəbərinə görə, 4 gün ərzində Şamaxıda baş tutacaq layihədə iştirakçılar müxtəlif mövzular ətrafında müzakirələr apararaq siyasi analiz bacarıqlarını göstərmək üçün imkan qazanacaqlar.

Layihənin əsas məqsədi gəncliyin siyasi biliklərinin hərtərəfli inkişafına təkan vermək və vətəndaş mövqeyini konstruktiv şəkildə bildirməsini stimullaşdırmaqdır.

Qeyd edək ki, “Könüllülər Parlamenti” layihəsi Azərbaycan Respublikası Milli Məclisinin simulyasiyası əsasında təşkil olunacaqdır. Seçiləcək 80 nəfər gənc Milli Məclisin simulyasiyasının 4 günlük sessiyalarında iştirak etmək üçün Şamaxı şəhərinə səfər edəcəklər. Eyni zamanda gənclər layihənin gedişi zamanı yalnız simulyasiya ilə kifayətlənməyəcək, bir neçə sosial aksiyada iştirak edəcəklər.

Layihəyə seçiləcək şəxslər 6-8 oktyabr tarixlərində siyasi analitiklər, politoloqlar və millət vəkilləri tərəfindən qoyulmuş mövzularla bağlı xüsusi təlimlərə qatılacaqlar.

Təlimlərdən sonra 10 oktyabrda iştirakçılar öyəndikləri mövzuları yetərincə mənimsədiklərini nümayiş etdirmək üçün yazılı formada onlara təqdim olunmuş mövzuları artıq öz subyektiv yanaşmalarına əsasən təqdim edəcəklər. Burada analiz qabiliyyətləri ilə seçiləcək şəxslər baş tutacaq simulyasiyada iştirak hüququ qazanacaqlar.

“Könüllülər Parlamenti Azərbaycan” layihəsinin iştirakçısı olmaq istəyən gənclər aşağıdakı keçiddən qeydiyyatdan keçə bilərlər.

Müəllif: Nailə Məhərrəmova

Bütün xəbərlər Facebook səhifəmizdə