“Azərbaycan əlehinə təbliğat aparan şəxslərə hakimiyyətin tövbə qapısı açıqdır” MÖVQE

“Cənab prezident bağışlayan və günahlardan keçəndir”. SİA-nın verdiyi məlumata görə, bunu kinodramaturq, Kinematoqrafçılar İttifaqının sədri Rüstəm İbrahimbəyovun Azərbaycana gəlməsi ilə bağlı Yeni Azərbaycan Partiyası icra katibinin müavini, millət vəkili Siyavuş Novruzov mətbuata açıqlamasında bildirib.

S.Novruzov bildirib ki, bu gün ölkədə çox böyük işlər gedir və islahatlar aparılır: “Bütün bunlarla bağlı müvafiq addımlar atılır. Bütün sahələrdə inkişaf olduğu kimi, bu inkişafın həyata keçirilməsi üçün müvafiq Dövlət Proqramları var. Hamısı həm struktur islahatlarda, həm iqtisadiyyatda, həmçinin kənd təsərrüfatında, sosial təminata yeni baxış, minimum əmək haqlarının artırılması, pensiyaların artırılması məsələləri dövlətin ən priolitet istiqamətlərindəndir. Bütün sahələrə nəzər salsaq dünyada baş verən hadisələrin çərçivəsində Azərbaycan uğurla inkişaf edir və bu gün də davam olunur. Hazırda Azərbaycanda çox ciddi ictimai-siyasi sabitlik var. Xalq-iqtidar birliyi hökum sürür. Son seçkilərdə dediklərimin bir daha bariz nümunəsidir. Azərbaycan xalqı bir daha göstərdi ki, öz prezidentinin yanındadır. Prezidentin hərtərəfli siyasətində bütün sahələrdə: istər ictimai siyasi, istər hüquqi, istər mənəvi, tolerantlıq, idman, sisyasi sistemin formalaşması, mətbuatın azadlığı, internet azadlığı və digər başqa-başqa sahələr ölkə başçısının diqqətindədir. Bəzən bu sahələrdə sui-istifadə halları da olur. O cümlədən humanizim Heydər Əliyevin siyasətinin əsas aparıcı xətlərindən biri olub. O, əfv sərəncamları, amnisiya aktları imzalayıb. Bu uğurlu siyasət hazırda Heydər Əliyevin davamçısı İlham Əliyev tərəfindən davam etdirilir. Bu günə qədər 70 qədər əfv sərəncamı imzalanıb. Həmçinin indiyədək Heydər Əliyev Fondunun prezidenti, Mehriban xanım Əliyevanın təşəbbüsü ilə böyük amnistiya aktı imzalanıb. Kim isə səhvini başa düşür, elədiyi əməldən peşmançılıq çəkir, vaxti ilə bu məsələləri görməyib, indi görmə imkanları bərpa olunubsa, həmin insanlar həmişə humanizim aktının obyektinə çevrilə bilirlər. Hər zaman bağışlamaq hüququ böyük Allaha məxsusdur, Konstitusiyada isə cənab prezidentə məxsusdur. Cənab prezident bağışlayandı və günahlardan keçəndir".

Yeni Azərbaycan Partiyası icra katibinin müavini xaricdəki azərbaycanlılara da səslənib: "Xaricdə Azərbaycan əlehinə təbliğat aparan şəxslərə hakimiyyətin tövbə qapısı açıqdır. Ölkə prezidenti İlham Əliyev səhv edən siyasətçiləri və vətəndaşları bağışlayıb”.

S.Novruzov mətbuat vasitəsilə xaricdəki azərbaycanlılara səslənib: “Xaricdə ölkəmiz və hakimiyyətimiz əleyhinə təbliğat aparmayın. Ölkəmizə qayıdın. Xarici lobbilərin pullarına aldanmayın. Ölkəmizi sevin və gəlin dövlətimizin inkişafı naminə cənab prezidentə dəstək verək. Cənab prezident İlham Əliyev və ölkənin birinci vitse-prezidenti Mehriban Əliyeva daim səhv edən şəxsləri əfv edib. Hər bir azərbaycanlı bu cür xoş addımları dəyərləndirməyi bacarmalıdır".

Bütün xəbərlər Facebook səhifəmizdə