"Fransadakı aksiya qarşısıalınmaz dərəcədə genişlənməkdədir" ÖZƏL-MÖVQE

“Fransada qaynayan qazanın suyu Avropanın digər "demokratik” ölkələrinə də sıçrayıb. İlk olaraq Yunanıstanda gərgin olaylar başlayıb. Paytaxt Afinada etirazçılar küçələrə axın edərək polisə daş və "Molotov kokteyli” atıblar. Etiraz aksiyası 2008-ci ildə 15 yaşlı gəncin polis tərəfindən qətlə yetirilməsinin ildönümü ilə bağlı keçirilib. Daha sonra Belçika və Hollandiyada iğtişaşlar başlayıb”. Bunu SİA-ya Bütöv Azərbaycan Xalq Cəbhəsi Partiyası (BAXCP) sədrinin müavini, QHT sədri Niyaməddin Orduxanlı deyib.

Onun sözlərinə görə, Belçikanın paytaxtı Brüsseldə aksiyalar təşkil edən yüzlərlə "Sarı jiletli” küçələrə axışıb: “Onlar "sarı jiletli” və "qış yaxınlaşır” parnkartları açaraq Avropa İttifaqının qurumlarının yerləşdiyi binalara doğru yürüş keçiriblər. Avropa İttifaqı Şurasının binası yaxınlığında etirazçıları polis qarşılayıb və 50 nəfəri həbs ediblər. Hollandiyanın paytaxtı Amsterdam da etiraz aksiyalarına ev sahibliyi edib. Nümayişdə hökumətin istefası tələb edilib. 11 ayrı nöqtədə toplanan "Sarı jiletlilər”in geniş nümayiş keçirirlər. Hər dörd dövlətdə narazı kütlə polislər tərəfindən ən sərt üsullarla dağıdılıb, insanlara güc tətbiq edilib. Bir sıra ekspertlərə görə, Avropanı silkələyən etirazların kökündə toplumları bezdirən qlobal iqtisadi böhran, ciddi maliyyə problemləri və siyasi idarəetmədən narazılıq dayanır.

Avropa ölkələri illərlə digər dövlətlərə "insan hüquqları”nın qorunmasından "dərs” keçiblər. Öz dövlətlərini nümunə göstəriblər. Ancaq yaşanan olaylar göstərdi ki, Qərb ölkələrinə rəhbərlik edən güclər heç də demokratik ənənələrə sadiq deyillər. İstədikləri zaman gənc, yaşlı, qadın, uşaq bilmədən döyə, öldürə bilirlər. Son olaylardan sonra bir daha sübut olundu ki, demokratiya bunlar üçün sadəcə bir təzyiq vasitəsidir. Hər gün, hər ay insan hüquqlarından danışan, sərbəst toplaşmaq azadlığından bəhs etməkdən yorulmayan bir sıra beynəlxalq təşkilatlar Fransada baş verən polis zorakılığını, qarşıdurmaları görmür, yazud özlərini görməzliyə vururlar. Polisin vətəndaşlara verdiyi işgəncələrə susurlar. Çünki həmin beynəlxalq təşkilatlar bəlli güc mərkəzlərinin nəzarətindədir. Ona görə də susmaq məcburiyyətində qalırlar”.

Partiya funksionerinin sözlərinə görə, Fransada "Sarı jiletlilər” adı ilə başlanan aksiya qarşısıalınmaz dərəcədə genişlənməkdədir: "Hüquq-mühafizə orqanları açıq şəkildə, bütün dünyanın gözü qarşısında sosial vəziyyətə etiraz edən insanlara divan tutmaqdadır. Avropanın aparıcı ölkəsi, eyni zamanda Minsk Qrupunun həmsədr ölkəsi olan Fransada neçə gündür əhali ilə hüquq-mühafizə orqanları arasında ciddi qarşıdurmalar davam etməkdədir. On minlərlə insan küçələrdə hökumət üzvlərinə, ölkənin siyasi rəhbərliyinə kəskin etiraz etməkdədir. Minlərlə insan həbs edilib, yüzlərlə mitinqçi və polis ağır xəsarətlər alıblar, 3000-dən artıq aksiyaçı həbs edilib. Hökumət nəzərdə tutulan vergi tutumunun qaldırılmamasını bəyan etsə də, dinc proses bitmir. Qərb mətbuatının yaydığı məlumata görə, aksiya və polis işciləri arasında dünyasını dəyişənlər var. Fransada baş verənlər birbaşa hökumətin istefası üzərində köklənir. Bu da deməyə əsas verir ki, Fransada baş verənləri məqsədli şəkildə idarə edənlər var. Yəni açıq desək, Qərb Fransada hökumətin devrilməsinin tərəfdarı kimi görünür. Heç də təsadüfi deyil ki, ABŞ Prezidenti Donald Tramp sosial şəbəkə vasitəsi ilə aksiyaçılara dəstəyini nümayiş etdirdi”.

Müəllif: Ceyhun Rasimoğlu

Bütün xəbərlər Facebook səhifəmizdə