"Azərbaycanın MDB məkanındakı yeri və rolu hər zaman xüsusi önəm kəsb edib və biz, adıçəkilən Birliyin Sankt-Peterburqda keçirilən qeyri-rəsmi Zirvə toplantısında bu gerçəkliyin növbəti dəfə şahidi olduq". Bu fikirləri SİA-ya SƏS Media Qrupun rəhbəri, siyasi ekspert Bəhruz Quliyev sözügedən mövzuya münasibətini açıqlayarkən deyib.
Siyasi ekspert xatırladıb ki, Zirvə toplantısında Azərbaycanın əhəmiyyətini bir sıra diqqət çəkən məqamlar təşkil edib: "Xüsusilə, Marinskiy teatrında təqdim edilən tamaşa zamanı digər MDB ölkə rəhbərlərindən fərqli olaraq, Prezident İlham Əliyevin Rusiyanın dövlət başçısı Vladimir Putinlə eyni sırada və sağ tərəfində əyləşməsi qarşı tərəfin Ona göstərdiyi sayğı və ehtiramın bariz göstəricisi kimi qiymətləndirilməlidir. Yəni həm siyasi baxımdan, həm də şəxsi nöqteyi-nəzərdən cənab Putinin İlham Əliyev cənablarına bu münasibəti xüsusi ehtiramın nümayişidir. Halbuki, Ermənistanın baş naziri vəzifəsini icra edən Nikol Paşinyan sıranın sonunda və cangüdənlərə yaxın yerdə əyləşdirilmişdi və bu fakt medianın da gözündən yayınmadı. Bunun isə əlbəttə ki, bir sıra səbəbləri də var".
Bəhruz Quliyev əlavə edib ki, bu, ilk növbədə Ermənistanın mövcud hakimiyyətinin siyasi diplomatiyası və xarici siyasətində buraxdığı köklü səhvlərin növbəti təzahürləridir: "Bütün bunların kökündə dayanan əsas faktor bu ölkənin işğalçılıq siyasəti yürütməsidir. Eyni zamanda, "məxməri inqilab" deyilən idarəolunmuş bir siyasi proses vasitəsi ilə ortaya atılan Paşinyanın və ətrafının ilk günlərdən anti-Rusiya xarakterli çıxışlar etməsi də onun Santk-Peterburqda düşdüyü ağır duruma açıq dəlalətdir. Ermənistanın Avrasiya İttifaqı və KTMT-də rüsvayçılığa uğraması, həmçinin, Nikol Paşinyanın heç bir siyasi diplomatik, eləcə də etik çərçivəyə sığmayan hərəkət və davranışlarının bu qurumlarda xüsusi çəkisi olan ölkə rəhbərləri tərəfindən sərt şəkildə qınanılması onun ölkəsinin nüfuzunun daha da aşağıya düşməsinə səbəb oldu. Ümumiyyətlə, Ermənistanın siyasi, iqtisadi və sair sferalarda aldığı ardıcıl məğlubiyyət zərbələrinin hər birində güclü, qüdrətli Azərbaycan faktorunu görmək mümkündür. Yəni yuxarıda qeyd edilən hər bir nüans, hər bir məqam bilavasitə Azərbaycanın siyasi diplomatik qələbəsi olaraq qiymətləndirilir".
SƏS Media Qrupun rəhbəri əlavə edib ki, qeyri-rəsmi Zirvə toplantısında cılız və gərəksiz Ermənistan rəhbərliyi qarşısında praqmatik baxışlara söykənən xarizmatik Azərbaycan lideri dayanmışdı: "Bu məqamın da təhlilini apararkən nəticəyə gələ bilərik ki, Prezident İlham Əliyev diplomatik baxımından məhz öz strategiyasını müəyyənləşdirir və bu strategiya istər bu, istərsə də digər beynəlxalq toplantılarda uğurlu təsdiqini tapmaqdadır. İstər milli maraqlarımızın qorunmasında, istər ölkəmizin beynəlxalq arenadakı mövqeyinin yüksəlməsinə xidmət edən bu diplomatik strategiya qarşıda daha böyük uğurlara imza atmağımıza səbəb olacaq".
Siyasi ekspert yeri gəlmişkən qeyd edib ki, daha bir diqqətçəkici məqam Prezident İlham Əliyevin toplantı çərçivəsində Azərbaycanın üzvü olmadığı KTMT ölkələrinin rəhbərləri ilə müxtəlif səpgilərdə müzakirələr aparmasıdır: "Bu müzakirələrdən yalnız Ermənistan kənarda qalıb. Ermənistanın KTMT-yə üzv olmasına rəğmən, bu ölkənin təmsilçisinin bəlli səbəblərdən baş katiblik vəzifəsindən uzaqlaşdırılmasının ardınca, seçiləcək yeni baş katibin yenidən erməni təmsilçisi olması məsələsi qapadılıb. Halbuki, Ermənistan tərəfi bu postun 2020-ci ilə qədər onlara məxsus olduğunu iddia edirlər. Hətta Azərbaycanın bu quruma müşahidəçi qismində üzv yazılması ehtimalı barədə danışılarkən, erməni tərəfi ciddi-cəhdlə bu qərarın verilməyəcəyini "əminliklə" bəyan edirdilər. Lakin biz bütün bunların tam əksini gördük. Hətta ölkəmiz KTMT-də müşahidəçi qismində deyil, bilavasitə ayrı dövlət olaraq sözünü deyir və bu quruma üzv olan ölkələrin rəhbərləri ilə görüşüb-müzakirələr aparır. Əlbəttə ki, bu reallıq Azərbaycan Prezidenti cənab İlham Əliyevin siyasi diplomatik gücünün, qətiyyət və iradəsinin məntiqi nəticəsi, Ermənistanın isə yanlış siyasətinin, uğursuz strategiyasının, ən əsası isə, məğlubiyyətinin aşkar göstəricisidir".
Bütün xəbərlər Facebook səhifəmizdə
USD
EUR
GBP
RUB