Azərbaycanla NATO-nu birləşdirən SƏBƏBLƏR

“Azərbaycan NATO üçün bir neçə səbəbdən lazımlı ölkədir. Birincisi, ölkəmiz etibarlı tərəfdaşdır. Belə ki, Əfqanıstana yüklər, humanitar yardımlar Azərbaycan üzərindən aparılıb. İkincisi, Qafqazda ən böyük, ən güclü dövlət Azərbaycandır, ən güclü ordu da Azərbaycandadır”. Bunu SİA-ya açıqlamasında millət vəkili Tahir Kərimli deyib.

Onun sözlərinə görə, ümumiyyətlə, NATO Xəzər dənizi ətrafında, xüsusən də dənizin qərb tərəfində güclənmək məsələsində Azərbaycana etibar edib: “Bundan başqa, Azərbaycan İranın şimal sərhədində yerləşir, İran və Rusiya arasında yeganə dövlətdir ki, hər ikisi ilə sərhədi var. Buna görə də, Azərbaycan NATO-ya lazımdır".

T.Kərimli əlavə edib ki, Ümummilli Lider Heydər Əliyevi bütün dünyanın tanıması, Prezident İlham Əliyevin ölkədə sabitliyi təmin edən bir dövlət başçısı kimi nüfuza malik olması və indiyə qədər istər Qərb, istərsə də başqa dövlətlər arasında heç bir ikili mövqe tutmaması NATO üçün çox önəmlidir.

Məlumat üçün nəzərinizə çatdıraq ki, Azərbaycan Prezidenti İlham Əliyev ötən gün Brüsseldə NATO-nun Şimali Atlantika Şurasının iclasında iştirak edib. Azərbacan Prezidenti bu gün Brüsseldə 5-ci Avropa İttifaqı “Şərq tərəfdaşlığı” sammitinə qatılacaq.

Müəllif: Nailə Məhərrəmova

Bütün xəbərlər Facebook səhifəmizdə