Baş prokurorun müavini: "Seçki prosesində qanun pozuntuları azalıb"

"Qanun pozuntularının sayının azalması seçki komissiyalarının işinin düzgün qurmasının nəticəsi kimi qiymətləndirilməlidir". SİA-nın xəbərinə görə, bunu baş prokurorun birinci müavini Rüstəm Usubov Mərkəzi Seçki Komissiyasında (MSK) dairə seçki komissiyaları (DSK) sədrləri üçün seçki hüququ üzrə ixtisaslaşdırılmış kursda çıxışı zamanı deyib.

 Həmçinin R.Usubov vurğulayıb ki, seçki komissiyaların fəaliyyətinə müdaxilə edənlər "Cinayət Məcəlləsi"nə uyğun məsuliyyətə cəlb oluna bilərlər.

R.Usubov Azərbaycanda keçirilən seçki prosesində daxil olan müraciətlər barədə də məlumat verib: "2005-ci ildə keçirilən parlament seçkilərinin nəticələri ilə bağlı Baş Prokurorluğa 365 müraciət daxil olub. Həmin müraciətlərin 102-i MSK-dan, 35-i dairə seçki komissiyalardan, 4-ü partiyalar blokundan, 31-i hüquq mühafizə orqanlarından, 193-ü isə vətəndaşlardan daxil olub. Müraciətlərə əsasən  20 DSK ilə bağlı cinayət işi qaldırılıb. Onlardan 10 DSK-nın nəticələri ləğv edilib. 4 dairə seçki komissiyasının nəticəsi MSK, 6 dairə seçki komissiyasının nəticəsi isə Konstitusiya Məhkəməsi tərəfindən ləğv edilib".

Baş Prokurorluq rəsmisi vurğulayıb ki, 2008-ci ilin prezident seçkiləri zamanı Baş Prokurorluğa heç bir müraciət daxil olmayıb.

"2010-cu ildə parlament seçkiləri ilə bağlı 89 müraciət daxil olub. Həmin müraciətlərin 83-ü MSK və DSK-lara aid olub. Bir müraciətlə bağlı isə cinayət işi açılıb. Bu, 89 saylı Göyçay-Ağdaş Dairə Seçki Komissiyasında namizədliyi qeydə alınan Vidadi İsgəndərov tərəfindən məntəqə seçki komissiyalarının işinə müdaxilə olunması ilə bağlıdır. Bundan başqa daxil olan müraciətlərdən 5-inə şərh verilib".

Bundan başqa R.Usubov deyib ki, Azərbaycanda bütün sahələrdə korrupsiya faktları azalıb və bu, beynəlxalq təşkilatların hesabatında qeyd olunub: "Biz bundan sonra da korrupsiya hallarının qarşısının alınması üçün bu sahədə fəal olmalıyıq, inzibati tədbirlər və mütəmadi addımlar atmalıyıq".

Elvin Abdulqədirov

Şərh yaz