“Dövlət bayrağının tarixi” mühazirə

Bakı Şəhəri üzrə Təhsil İdarəsinin tabeliyində fəaliyyət göstərən təhsil müəssisələrində “Dövlət bayrağının tarixi” mövzusunda səyyar mühazirələr təşkil olunur. İdarənin mətbuat xidmətindən SİA-ya verilən xəbərə görə, səyyar mühazirələr Bakı Şəhəri üzrə Təhsil İdarəsi və Azərbaycan Respublikası Nazirlər Kabineti yanında Dənizkənarı Bulvar İdarəsinin birgə təşkilatçılığı ilə keçirilir.

Mühazirələrin keçirilməsində məqsəd məktəbliləri milli-mənəvi dəyərlərə, dövlət atributlarına hörmət və Vətənə məhəbbət ruhunda tərbiyə etmək, onlarda vətənpərvərlik hissini yüksəltməkdən ibarətdir.

Səyyar mühazirələrdə şagirdlərə Azərbaycan bayrağının günümüzə qədər keçdiyi tarixi yol, Azərbaycanın dövlət atributları haqqında məlumat verilir,müvafiq tarixi günlərin əhəmiyyəti vurğulanır. Eləcə də, şagirdlər bayrağımıza həsr olunmuş şeirlər səsləndirir, Azərbaycanın dövlət atributları ilə bağlı fikirlərini bölüşürlər.

Qeyd edək ki, 2017-ci ilin oktyabr-dekabr aylarında paytaxtın 19 ümumi təhsil müəssisəsində “Dövlət bayrağının tarixi” mövzusunda səyyar mühazirələrinkeçirilməsi nəzərdə tutulur.

Ümumilikdə, son 4 il ərzində BŞTİ-nin tabeliyində fəaliyyət göstərən 150-dən çox ümumi təhsil məktəbində “Dövlət bayrağının tarixi” mövzusunda səyyar mühazirələr təşkil olunub.

Müəllif: Nailə Məhərrəmova
loading...