Yeni tədris ilində UNEC-in ilk Elmi Şurasından mühüm məqamlar

UNEC-də Elmi Şuranın yeni tədris ilində ilk iclası keçirilib. UNEC-in Marketinq və Kommunikasiya Departamenti, İctimaiyyətlə Əlaqələr Şöbəsindən SİA-ya verilən məlumata görə, UNEC kollektivini yeni tədris ili münasibəti ilə təbrik edən rektor, professor Ədalət Muradov qarşıya qoyulan hədəflər naminə qazanılan uğurlarda hər kəsin əvəzsiz rolu olduğunu bildirib.

Müvəffəqiyyət göstəricisi 85, keyfiyyət göstəricisi isə 45%

2016/2017-ci tədris ilinin yay imtahan sessiyasının nəticələrinə görə, müvəffəqiyyət göstəricisi 85%, keyfiyyət göstəricisi isə 45% olub.

600 və daha yüksək bal toplayanların 60%-i UNEC-i seçib

Bu il UNEC-də qəbul planı yerləri ötən iki illə müqayisədə yenə də yüksək nəticə ilə - 96.6%-lə yerinə yetirilib. Belə ki, UNEC-ə qəbul planı üzrə 3415 yerin 3298-nə tələbə qəbulu həyata keçirilib.

Fakültələr üzrə daha yüksək göstərici Maliyyə və mühasibat fakültəsində qeydə alınıb. Bu fakültəyə qəbul planı 99.6% yerinə yetirilib. Bu il ən yüksək bal toplayanların UNEC-ə qəbul sayında da ciddi irəliləyiş müşahidə olunub. II ixtisas qrupu üzrə 600 və daha yüksək bal toplayan 481 nəfərin 288-i, yəni 60%-i UNEC-i seçib.

II ixtisas qrupu üzrə 700 bal yığan hər iki abituriyent UNEC-ə üstünlük verib

II ixtisas qrupu üzrə 700 ballıq nəticə göstərən abituriyentin hər ikisi – Cavad Əliyev və Arzu Məmmədzadə UNEC-i seçib. Onlar Beynəlxlaq İqtisadiyyat Məktəbində maliyyə ixtisası üzrə təhsil alacaqlar.

Beləliklə, 600 və daha yüksək balla UNEC-ə qəbul olan 290 abituriyentdən 70 nəfər 650-680, 17 nəfər isə 680-700 bal toplayıb. 2016-cı ildə 680-700 bal toplayan tələbələrin sayı 12, 2015-ci ildə 1 olub.

II ixtisas qrupu üzrə prezident təqaüdünə layiq görülənlərin 74%-i UNEC tələbəsidir

2016-cı ildə UNEC-ə qəbul olanlar arasında 6, 2015-ci ildə isə 1 tələbə prezident təqaüdünə layiq görüldüyü halda, bu il 17 tələbə prezident təqaüdünə layiq görülüb. Qürurverici haldır ki, prezident təqaüdünə layiq görülənlərin 17%-i, II ixtisas qrupu üzrə bu ada layiq görülənlərin isə 74%-i UNEC tələbəsidir.

UNEC-ə orta qəbul balında artım

UNEC-ə qəbulun nəticələrinə əsasən, orta balda da artım müşahidə edilib. Universitet üzrə 2014 və 2015-ci illərdə göstərici 391 və 396 bal olduğu halda, 2017-ci ildə bu rəqəm 412 bala qədər yüksəlib. Orta bal göstəricisinin maksimal həddi Beynəlxalq İqtisadiyyat Məktəbində qeydə alınıb. Belə ki, 2015-ci illə müqayisədə göstərici 96 bal artaraq 2016-ci ildə 635, bu il isə ötən illə müqayisədə 10 bal artaraq 645 bal olub.

Məlumat üçün qeyd edək ki, Beynəlxalq İqtisadiyyat Məktəbində minimal keçid balı 609, orta keçid balı isə 645 olub. İki il əvvəl yaradılan bu fakültəyə qəbul olan tələbələrin hamısı 600-dən çox bal toplayıb. Beynəlxalq İqtisadiyyat Məktəbinə qəbul olan tələbələrin 46 faizi orta məktəbi fərqlənmə ilə bitiriblər.

Tələbə biliyinin qiymətləndirilməsində yeni mərhələ

Şura üzvləri I kurslarda ixtisas fənləri üzrə 4 dildə vahid sillabuslardan istifadə etmək barədə qərar qəbul ediblər. Digər bir qərara görə isə tələbə biliyinin qiymətləndirilməsinin təkmilləşdirilməsi məqsədilə I kurslarda 2017/18-ci tədris ilinin qış imtahan sessiyası ixtisas fənləri üzrə 4 dildə də eyni suallar əsasında və yazılı formada keçiriləcək. Hər fənn üzrə eyni sayda sual hazırlanaraq, öncədən tələbələrə təqdim ediləcək. Ümumilikdə isə imtahan və appelyasiya qaydalarının təkmilləşdirilməsi prosesinin davam etdirilməsi qərara alınıb.

Yeni tədris ili - “Elmi Tədqiqat İli”

Elmi Şurada UNEC-də yeni tədris ili “Elmi Tədqiqat İli” elan edilib. Həmçinin “UNEC Tədqiqat Fondu” təsis edilib. Fondun məqsədi yerli və beynəlxalq ekspertlərin cəlb edilməsi ilə elmi tədqiqatların aparılması, tədqiqatların nəticələrinin tədqiqinə dair təkliflərin hazırlanmasıdır.

UNEC alimlərinin tədqiqatlarının keyfiyyətini daha da artırmaq məqsədi ilə Differensial Əməkhaqqı Sisteminə 19 dəyişiklik və əlavələr edilib.

UNEC-dən ixraca dəstək

Elmi Şurada Xarici Ticarətə Dəstək və Digital Marketinq mərkəzlərinin əsasnamələri təsdiq edilib. Xarici Ticarətə Dəstək Mərkəzi ixrac sahəsində sahibkarların və ixracatçıların dəstəklənməsi və onlara məsləhət xidmətlərinin göstərilməsi işlərinin təşkilini həyata keçirəcək.

Digital Marketinq Mərkəzi isə qeyri-neft ixracını həyata keçirən şirkətlər üçün vaxt və maliyyə xərclərinə qənaət etməklə digital marketinq vasitəsilə xarici bazarların operativ, etibarlı və spesifik araşdırmalarını aparacaq, professor-müəllim heyətinə və tələbələrə digital dünya ilə tanışlıq, effektiv istifadə və yararlanma keyfiyyətləri aşılayacaq.

UNEC-də institutlaşma davam edir

Şura üzvləri UNEC-də tədris prosesinin idarəolunmasını səmərəli təşkil etmək və kafedralarda tədris olunan fənlərin paralelliyini aradan qaldırmaq məqsədilə “Ekonometriya” kafedrasının “Statistika” kafedrasına birləşdirilərək, “Statistika və ekonometriya” kafedrası yaradılması barədə qərar qəbul ediblər.

4 ildə iki ixtisasa yiyələnmək imkanı UNEC-də reallaşır

UNEC-də Universitet Daxili İki Diplom (UDİD) proqramınln icrasına başlanılır. Proqramın məqsədi “Azərbaycan Respublikasında təhsilin inkişafı üzrə Dövlət Strategiyası”ndan irəli gələn tələbləri icra etmək, bakalavriat səviyyəsində qəbul olunduğu ixtisaslarda müvəffəqiyyətlə təhsil alan tələbələrin ikinci ixtisas üzrə də əlavə təhsil almaqla, rəqabətədavamlı mütəxəssis kimi hazırlanmasıdır. UDİD proqramına qoşulan tələbələr 4 il ərzində iki ixtisasa yiyələnməklə gələcəkdə əmək bazarında layiqli yer tutmaq və onun tələblərinə çevik uyğunlaşmaq imkanı əldə edəcəklər.

Müəllif: Nailə Məhərrəmova

Bütün xəbərlər Facebook səhifəmizdə