ADU-da “CLS Azerbaijani” Proqramının bağlanış mərasimi keçirilib FOTO

Bu gün Azərbaycan Dillər Universitetində (ADU) universitetin Beynəlxalq əlaqələr üzrə prorektoru, dosent Jalə Qəribovanın təşkilatçılığı ilə ABŞ Dövlət Departamentinin Amerika Şurası və ADU-nun birgə layihəsi olan “CLS Azerbaijani” (Önəmli dil təqaüdü) Proqramının bağlanış mərasimi keçirilib.

ADU-dan SİA-ya verilən məlumata görə, bağlanış mərasimində ABŞ-ın ölkəmizdəki səfirliyinin əməkdaşı Rey Neyler, Amerika konsulluğunun Azərbaycan üzrə direktoru Codi Blakenşip, tələbələrə Azərbaycan dilini tədris edən müəllimlər, dil həmkarları, eyni zamanda amerikalı tələbələr iştirak edib.

Azərbaycan dilini öyrənmiş amerikalı tələbələrin bu işin öhdəsindən yüksək bacarıqla gəldiklərini deyən J.Qəribova proqram çərçivəsində 7 amerikalı tələbənin 8 həftə müddətində Azərbaycan xalqının mədəniyyəti, dili və tarixi ilə daha yaxından tanış olduqlarını söyləyib. Tələbələrdə bu dili öyrənməyə böyük maraq gördüyünü deyən J.Qəribova ənənəyə sadiq qalaraq əlaqələrin davam edəcəyinə ümid etdiyini vurğulayıb. J.Qəribova proqramın icrasında dəstək göstərənlərə təşəkkürünü bildirib, tələbələrə uğurlar arzulayıb.

ABŞ səfirliyinin əməkdaşı R.Neyler, Amerika konsulluğunun Azərbaycan üzrə direktoru C. Blakenşip tələbələrin Azərbaycan dilinə yiyələnmələri üçün yaratdıqları şəraitə görə universitet rəhbərliyinə və əməyi keçənlərə təşəkkür edib, tələbələrə uğurlar arzulayıblar.

Sonra amerikalı tələbələrə Azərbaycan dilini öyrədən müəllimlər, həmçinin onları evlərində qonaq edən valideynlər fikirlərini bildiriblər.

Daha sonra ölkəmiz haqqında öz təəssüratlarını bölüşən amerikalı tələbələr musiqisi Emin Sabitoğlu və sözləri Fikrət Qocaya aid olan “Payız gəldi” mahnısını ifa ediblər.

Bakıda və rayonlarda amerikalı tələbələrin müxtəlif tarixi abidələri ziyarəti zamanı və dərs prosesində lentə alınmış fotoşəkillərdən ibarət videoçarx göstərilib.

Sonda amerikalı tələbələrə, dil həmkarlarına və Azərbaycan dilini tədris edən müəllimlərə hədiyyələr təqdim olunub.

Qeyd edək ki, “CLS Azerbaijani” (Önəmli dil təqaüdü) Proqramı çərçivəsində Azərbaycan dilini öyrənən amerikalı tələbələr proqram müddətində Bakıda Qız Qalası, Yanardağ, Şirvanşahlar Sarayı, Atəşgah məbədi, Palçıq vulkanları, Qala Arxeoloji-Etnoqrafik Muzey Kompleksi, həmçinin muzeylər və digər görməli yerlərdə olublar. Eyni zamanda rayonlara təşkil olunan səfər çərçivəsində tələbələr həmin ərazilərin tarixi abidələri, adət-ənənələri, əhalisi ilə yaxından tanış olublar. Tələbələr Azərbaycan mətbəxi ilə də tanış olaraq qutabın hazırlanması qaydasını öyrəniblər. Proqram müddətində tələbələrə dil və mədəniyyət mövzularında mühazirələr də təşkil olunub.

loading...