“Musiqi alətləri: birlik və müxtəliflik“

Heydər Əliyev Mərkəzində tezliklə “Musiqi alətləri: birlik və müxtəliflik” adlı sərgi açılacaq. SİA-nın məlumatına görə, hazırda sərgi üzərində son tamamlama işləri gedir və yeni mövsümdən daha bir unikal layihə izləyicilərin ixtiyarına veriləcək.
Ekspozisiyada müxtəlif ölkələrin XVIII-XX əsrlərə aid 170-dən çox musiqi aləti nümayiş olunacaq.
Əsrlər boyu bir-birinə qonşu olan ölkələrdə vahid mədəni məkan yaranıb və qarşılıqlı əlaqələr nəticəsində bir çox oxşar musiqi alətləri meydana gəlib. Tədricən bu musiqi alətləri dünyanın müxtəlif yerlərinə yayılıb. Bununla yanaşı, ayrı-ayrı ölkələrdə yalnız onlara aid olan milli musiqi alətləri də mövcuddur.
Sərgidə təqdim edilən eksponatlar Azərbaycan, Albaniya, Bolqarıstan, Çin, Dağıstan (Rusiya Federasiyası), Əfqanıstan, Əlcəzair, Gürcüstan, Hindistan, İndoneziya, İraq, İran, Kipr, Qazaxıstan, Qırğızıstan, Liviya, Macarıstan, Makedoniya, Mərakeş, Misir, Monqolustan, Özbəkistan, Pakistan, Rumıniya, Serbiya, Suriya, Tacikistan, Türkiyə, Türkmənistan, Yəmən və Yunanıstana aid olub, musiqi alətləri arasında həm oxşarlığı, həm də fərqliliyi təcəssüm etdirəcək. Ekspozisiya birlik və müxtəliflik prinsipinə əsaslanaraq bölmələrə ayrılıb.

Bütün xəbərlər Facebook səhifəmizdə