“Heydər Əliyev və Özbəkistan” adlı foto sərgi açılıb FOTOLAR

Özbəkistanda Ümummilli Lider Heydər Əliyevə həsr olunmuş silsilə tədbirlər keçirilməkdədir. SİA Mədəniyyət Nazirliyindən verilən xəbərə görə, Azərbaycanın Özbəkistandakı Səfirliyinin və onun nəzdindəki Heydər Əliyev adına Mədəniyyət Mərkəzinin əməkdaşları anım günü münasibəti ilə ulu öndər Heydər Əliyevin Mədəniyyət Mərkəzinin qarşısındakı büstü önünə gül və çiçəklər qoyublar.

Mərkəzin foyesində Ulu Öndər Heydər Əliyevin fəaliyyəti, onun xalqımız qarşısındakı xidmətlərinə həsr edilmiş kitab sərgisi, “Heydər Əliyev və Özbəkistan” foto sərgi təqdim olunub. Qeyd edək ki, sərgi ilə Daşkənddəki bir sıra ali məktəblərin tələbələri və orta məktəblərin şagirdləri də tanış olublar.

Özbəkistanın “Türküstan” Respublika sarayında Daşkənddəki uşaq evləri arasında keçirilən xeyriyyə Festivalının əsas sponsoru Özbəkistandakı Heydər Əliyev adına Azərbaycan Mədəniyyət Mərkəzi olub. Mərkəz Festivalda iştirakını Azərbaycan xalqının Ümummilli Lideri Heydər Əliyevə həsr edib.

Daşkənd şəhərində fiziki qüsurlu və yetim uşaqlar üçün təşkil olunan xeyriyyə festivalında 15 uşaq evinə Azərbaycan Mədəniyyət Mərkəzi tərəfindən hədiyyələr verilib və Mərkəz tərəfindən hazırlanan konsert proqramı təqdim edilib. Daşkənd Vilayət Həmkarlar İttifaqının sədri Murodcan Nasırov giriş çıxışı edərək “Mexricon” uşaq evləri Asossiyasının Özbəkistandakı Heydər Əliyev adına Azərbaycan Mədəniyyət Mərkəzi ilə birgə artıq ənənəyə çevrilən festivalını yüksək qiymətləndirib və gələcək nəsillər olan, xüsusi qayğıya ehtiyacı olan uşaqlara daim diqqətlə yanaşmağın vacib olduğunu vurğulayıb. O, Özbəkistan dövləti tərəfindən uşaq siyasəti, gələcək nəsillərin xoşbəxt həyatı üçün çoxsaylı işlərin və layihələrin həyata keçirildiyini söyləyib. Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov uşaqları salamlayaraq, Ulu Öndər Heydər Əliyev, onun xalqımız üçün xidmətlərindən danışıb, dahi rəhbərin uşaqlara daim qayğı ilə yanaşdığını vurğulayıb. Diplomat Ulu Öndərdən sitat gətirərək qeyd edib ki, “uşaqlar bizim gələcəyimizdir. Biz onları necə tərbiyyə edəcəyik, necə öyrədəcəyik, bu cür gələcək bizi gözləyir. Samir Abbasov ulu öndərin adını daşıyan Heydər Əliyev Fondunun hər il uşaqlar üçün böyük layihələr həyata keçirdiyini qeyd edib.

Daha sonra tədbirin təşkilatçıları Heydər Əliyev adına Azərbaycan Mədəniyyət Mərkəzinin uşaq evləri üçün hazırladıqları hədiyyələri iştirakçı məktəblərə təqdim ediblər. Tədbirdə istedadlı uşaqların hazırladığı şeirlər, kompozisiyalar nümayiş etdirilib. Fiziki qüsurlu uşaqlar tərəfindən hazırlanan proqram, iştirakçıların marağına səbəb olub.

Festival çərçivəsində Daşkənddəki “Turon” restoranında uşaq və yeniyetmələr yemək və şirniyyatlara qonaq ediliblər.

Bütün xəbərlər Facebook səhifəmizdə