Tanınmış rəssam ölkəmizi beynəlxalq qurumda təmsil edib

Moskvada Avrasiya Ölkələri Müəllif Hüquqları Konfederasiyasının üç günlük konfransı keçirilib. SİA-nın məlumatına görə, tədbirdə ölkəmizi Azərbaycan Rəssamlar İttifaqının üzvü, tanınmış rəssam Günay Mehdizadə təmsil edib.

YEAKOP baş direktoru, Azərbaycan Müəllifləri İctimai Birliyinin sədri İsmayıl Məmmədkərimov bildirib ki, Avrasiya Ölkələri Müəllif Hüquqları Konfederasiyasında Avrasiya İqtisadi İttifaqı və MDB çərçivəsində təmsil olunan dövlətlərinin müəllif hüquqları sahəsi üzrə ixtisaslaşan ziyalı insanlarla yanaşı, aparıcı milli cəmiyyətlər də təmsil olunmaq iqtidarındadır.

Onun sözlərinə görə, təşkilatda Xalq yazıçıları Çingiz Abdullayev, Anar, Fikrət Qoca kimi ziyalılarla yanaşı, tanınmış Azərbaycan bəstəkarlarının da adı yer alır: “Təşkilat yalnız üzvlərdən deyil, eyni zamanda, prezidiumdan ibarətdir ki, bu da səs çoxluğu ilə müəyyən olunur. Həmin prezidiumda isə əsasən aktiv və daima inkişafa meyilli olan insanların cəlb olunmasına üstünlük verilir. Tanınmış rəssam Günay Mehdizadə isə gənc nəslin nümayəndəsi kimi olduqca aktiv və inkişafa meyillidir. Belə insanların Azərbaycanı istənilən qurumda təmsil edə bilməsi hər baxımdan perspektivlidir”.

Türkiyənin Azərbaycandakı səfirliyinin mədəniyyət və tanıtma müşaviri İrfan Çiftçi isə bildirib ki, Türkiyənin də müşahidəçi statusunda iştirak etdiyi bu toplantıda Azərbaycanın bir təmsilçisinin də beynəlxalq bir təşkilatda olması, eləcə də Günay Mehdizadənin YEAKOP idarə üzvlüyünə seçilməsi, Azərbaycanın və türk dünyasının qələbəsidir: “Günümüzdə internet vasitəsilə ən çox əməyi oğurlanan yaradıcı insanlardır. Mədəniyyət qurumları olaraq texnoloji vasitələrdən, müasir üsullardan istifadə edərək müəllif hüquqlarını qorumalıyıq. Sənəti və mədəniyyəti, xüsusən də gənclərin ən çox istifadə etdiyi internetdən təbliğ etməliyik. Günay xanım müasir fikirləri olan bir sənətçidir, buna görə də ondan mədəniyyət sahəsində daha böyük, yaradıcı işlər gözləyirik və buna ümid edirik”.

Günay Mehdizadə konfransda hər kəsin yekdilliklə ona səs verməsi ilə bağlı məmnunluğunu ifadə edib O deyib: “Qəlbi Azərbaycanla döyünən hər bir sənətçi həmkarlarımın adının beynəlxalq təşkilatlarda çəkilməsini ölkəmizin sevinci kimi qəbul edirəm. Rəsm əsərlərimin beynəlxalq məkanda müxtəlif ölkələrin sənətşünasları və bu sahənin təmsilçiləri tərəfindən qəbul olunaraq maraqla qarşılanması, təbii ki, böyük sevincdir. İnanıram ki, Azərbaycan mədəniyyəti adına daha böyük uğurları Vətənimə və xalqıma bəxş edə biləcəyəm”.

Bütün xəbərlər Facebook səhifəmizdə