Osetiya Teatrının rəhbəri Musiqili Teatrın qonağı olub

Rusiyanın Şimali Osetiya–Alaniya Respublikasının Vladimir Txapsaev adına Dövlət Akademik Milli Dram Teatrının direktoru və baş rejissoru, Şimali Osetiya-Alaniya Respublikasının xalq artisti, Vladislav Kоliev Azərbaycan Dövlət Musiqili Teatrının qonağı olub.

Qurumun mətbuat xidmətindən SİA-ya bildirilib ki, hörmətli qonağı Musiqili Teatrın direktoru, Əməkdar incəsənət xadimi, sənətşünaslıq üzrə fəlsəfə doktoru Əliqismət Lalayev qəbul edib. Səmimi və işgüzar şəraitdə keçən görüşdə Azərbaycan Dövlət Gənc Tamaşaçılar Teatrının direktoru, Əməkdar incəsənət xadimi Mübariz Həmidov və Musiqili Teatrın quruluşçu rejissoru, Əməkdar incəsənət xadimi Əsgər Əsgərov da iştirak ediblər, Osetiya Dövlət Akademik Milli Dram Teatrı- “İron Dramon Teatr”-ın və Azərbaycan teatrları arasındakı ikitərəfli əməkdaşlığın inkişafı, qarşılıqlı qastrol səfərlərinin təşkili və digər məsələlər ətrafında fikir mübadiləsi aparıblar.

Azərbaycanda keçirilən "Sərhədsiz teatr” III Beynəlxalq Şəki Teatr festivalı çərçivəsində ölkəmizdə səfərdə olduğunu və yaranmış fürsətdən istifadə edib Musiqili Teatra baş çəkməyi özünə şərəf bilən tanınmış Osetiyalı rejissor və aktyor V.Koliev rəhbərlik etdiyi Teatrla Azərbaycanda fəaliyyət göstərən nüfuzlu teatrlar arasında sıx əməkdaşlığın yaradılmasının zəruri olduğunu xüsusi qeyd edib.

"Möhtəşəmliyi ilə seçilən Azərbaycan Dövlət Musiqili Teatrında olmaq sözün əsl mənasında, mənə zövq verdi. Belə yaradıcı söhbətlər teatrlararası mədəni əlaqələrin yaranmasında sarsılmaz körpüdür. Biz Azərbaycan Dövlət Musiqili Teatrının səhnəsində Şimali Osetiya teatrı-“İron Dramon Teatr”ının kollektivinin çıxışlarını görmək arzusundayıq”, -deyə V. Koliyev bildirib.

Əliqismət Lalayev istedadlı Osetin rejissoru və aktyoru Vladislav Kоlievin irəli sürdüyü təklifləri müsbət qarşılayaraq yeni əlaqələrin yaranmasını yüksək qiymətləndirib və bu əlaqələrin gələcəkdə də uğurla davam etdiriləcəyinə ümidvar olduğunu vurğulayıb.

Bütün xəbərlər Facebook səhifəmizdə

loading...