Xalq Rəssamı Əzim Əzimzadənin xatirəsi anılıb

İçərişəhərdə Xalq Rəssamı Əzim Əzimzadənin anadan olmasının 138-ci ildönümü və sənətkarın adını daşıyan mənzil-muzeyin yaranmasının 50 illiyi münasibətilə tədbir keçirilib. SİA-nın məlumatına görə, tədbirdə Əzim Əzimzadənin ev-muzeyinin direktoru, tənqidçi-sənətşünas İradə Əzimzadə böyük sənətkarın həyat və yaradıcılığı barədə qonaqlara məlumat verib.

Bildirib ki, Əzim Əzimzadə 1880-ci il mayın 7-də Bakıda anadan olub. O, Azərbaycanın ilk Xalq Rəssamı, təsviri sənətdə tənqidi realizmin və qrafika sənətinin banisidir. 1906-cı ildən etibarən sənətkar satirik qrafika, illüstrasiya, plakat, teatr dekorasiyası sənəti sahəsində fəaliyyət göstərib. Bakıda nəşr olunan bir çox satirik jurnallar ilə əməkdaşlıq edən Ə.Əzimzadə bir çox kitablara, o cümlədən 1917-ci ildə M.Ə.Sabirin “Hophopnamə”sinə illüstrasiyalar çəkib.

Diqqətə çatdırılıb ki, Ə. Əzimzadə 1922-1931-ci illərdə “Molla Nəsrəddin” jurnalının baş rəssamı olub. İkinci Dünya müharibəsi dövründə alman faşizmini ifşa edən çoxsaylı karikaturalar, plakatlar, satirik rəsmlər çəkən sənətkar, gənc karikaturaçılar nəslinin yetişməsinə köməyini əsirgəməyib. Onun məktəbinin davamçıları bu gün xalq rəssamları, əməkdar rəssamlar, görkəmli incəsənət ustalarıdır.

Muzeyin direktoru deyib ki, böyük sənətkarın xatirəsinə həsr edilmiş tədbir, eyni zamanda, Beynəlxalq Muzeylər Günü çərçivəsində keçirilir.

Sonra qonaqlar “Rəngarəng dərs evi” rəsm dərnəyinin üzvlərinin əl işlərindən ibarət sərgiyə baxıblar.

Tədbir konsert proqramı ilə davam edib.

Bütün xəbərlər Facebook səhifəmizdə

loading...